Asape Wanorî On Maskiw Me Taasom.

1 Apa kah yawno, on wara wîîkes awya, ahce poyero amna mahsîpînkai okwe? Eroromerono wara amna mahsîpînkai okwe. Awoku cma re amna, kahn̂eru warai, cuh ken̂arî pono rma re amna, awok nahrî ken̂arî pono ha. Ahce poyero tak amna poko mîrwona?

2 Ayanan komo ponaro cma re mas amna ponaro. Pahxa amna mahsîyakn̂e epethîrî pona. Ayananî re thakwa amna. Ero yipu amna mahsîyakn̂e ayanan me. Siaw Yîpîn marha mahsîyakn̂e awekenî ro me. Ero ke ero ponaro marha cma re masî.

3 Xiya cma re mîmokyasî ewtotho pona. Eroromerono wara ro mak nas on ewtotho me okwe. Amînthîrî nîwîrîmetîketken̂e ro mak okwe aaxatî pîn komo Apa.

4 Awakro amna yesentacho yaw tak xatken̂e okwe aaxatî pîn komo, amîn yaw okwe. N̂emtarakexe ro mak iito kopi. Tukuknon komo marha n̂iir̂atken̂e iito, Amna rowon tan ha, kacho kica.

5 Comota namexe kîrkomo ero wa xatken̂e n̂examro amînthîrî poko okwe.

6 Tmewreso xakn̂e mîîmo mîtîtho, maria ke twakîknoso. Ero yiputho rma kr̂a nakuhr̂apetîketken̂e okwe yawaka ke, aama ke marha.

7 Amînthîrî nakn̂iyatken̂e okwe. Nîwîrîmetken̂e ro mak, Kaan Mîn Tan Ha, kachonho.

8 On wara ketken̂e tîhnaw so, N̂examro pen tar̂mexe ro mak exihra cehso ro, ketken̂e okwe. Amna rowon poko hakno nakn̂iyatken̂e Kaan poko amna yesenmetoponho ahnoro okwe.

9 Cirihnî ciitopo yenîhra tak amna nas okwe, kweronman̂e komo exihra ro mak tak nas okwe. Atî wicakî rma ka nai noro yipu komo ken̂ehra amna yehtopo, yîhtînopîra thakwa nas amna.

10 Atî wicakî rma ka nai aaxatî pîn komo ya awîrîyakacho Apa? Eroromero katî awosotî nîwîrîyaket ha?

11 Ahce kacho awamorî yenpora mai, kaari ha? Aponon yaka eyamxapu wara nas awamorî. En̂exa cma re mîmohkesî aaxatî pîn komo waihkachome tak.

12 Okayaritomonî tko Amoro Apa pahxanînhîrî rma. Roowo pono komo yakir̂waman̂e marha Amoro.

13 Amoro xa tuuna imo mîraconkekn̂e kar̂pe xa awexirî ke. Onok na komo pîtho mahkekn̂e yukwawno komo pîtho.

14 Amoro xa Repiatan pîtho mahkekn̂e yaakeno ke tîhtîpîkemî rma. Noro pen puntho mîmyakn̂e kamara warai yotî me, axawa imo pono yotî me.

15 Amoro marha tuuna pîtho mawkekn̂e, tuuna yaporî marha miir̂akn̂e. Anarimaw tuuna yepu mapainokekn̂e hara apaipînînhîrî ro.

16 An̂irithîrî marha on katpan hara. An̂irithîrî marha mîn awarpan hara. Katpan ciin̂enho Amoro Apa, kaamo yakrin̂enho marha.

17 Roowo wokpaman̂enho marha Amoro. Ahnoro mukuknomekn̂e wokpa komo. Kaamo me roro enmacho miir̂akn̂e Amoro, twotme roro enmacho marha miir̂akn̂e.

18 On wara marha wîîkes awya Apa, apoko n̂etaporetken̂e aaxatî pîn komo. Awosotî nîwîrîyaketken̂e marha akpîra cesehtînosom komo. Ero wa ehtopo komo ponaro rma esko.

19 Potkuku warai makî reha owî. Noro reha n̂expe kamara warai komo yotî me, kahra esko opoko. N̂esemetanmekyaxe ayanan komo. N̂examro ponarono pîn wara exihra tak esko Apa. Waihyaxe men okwe.

20 Amtapotachonhîrî ponaro marha esko, Kukurunpexe so, kachonho ponaro. Mînto mînto wara naxe awarpan chewno komo. Iito so naxe mer̂pora kîpînîn yawno pîn komo ro mak okwe.

21 Anarimaw so emetanmexapu komo porohyaxe okwe ahna so na tîto xatînhîrî komo. Ahce na poko n̂ehn̂exe ro mak okwe. Noro yipu komo cma re makronomesî Apa ehn̂an me tak ehtome so. Cesemetanmesom komo cirko awosotî poko tahwotaxmu me.

22 Awomko Apa, kir̂wanî ro me awehtopo enpoko amna ya. Awîrîyakexe kica akpîra cehsom komo. Kaamo po roro ero wa kexe apoko kica. Yîmtapotarî komo men entakî.

23 Aaxatî pîn komo mtapotarî poko yîtwen̂ekarîntara esko. Wara ro mak ketîkexe kica. Ero ke yîmtapotarî komo poko yîtwen̂ekarîntara esko. Ero wa esko.