Asape Wanorî On.

1 On wara wîîkes awya so, Ixaw Yana komo wakren̂e Mîk Kaan, esumnî yîropotarî komo wakren̂e ha tko.

2 Owî reha ehrokaporo wîxakn̂e okwe. Sehrere wîîkarî ha re okwe pupyaka.

3 Cehcoyoponkaxmu komo pona kpohnakn̂e kica. Ero wa wîxakn̂e cemyawnoyem komo yeen̂ataw, kicicme cehsom kom ha.

4 Ahwokamexpotopo komo ken̂ehra ro mak naxe, amotopîra so marha.

5 Anarî komo warahra naxe n̂examro, esemetanmekîra naxe, amotopîra so n̂he marha naxe anarî komo warahra.

6 Ero ke anarî komo yopono me n̂esehtînoyaxe kica. N̂examro warî wara rma nasî ehcoyoponkacho komo. Waihkano ritopo marha nasî ponon komo wara hara.

7 Nupurukwaxe marha kica. Ero ke ewpen̂e so tak naxe. Yiixe kehtopo komo yopono me mak nasî n̂examro yemyawno.

8 N̂ewrexe marha kica anarî komo poko. Kicicme ro mak nîmtapowaxe yîwîrîmano ritopo poko. Cehcoyoponkarî komo poko marha nîmtapowaxe okwe.

9 Kah yawno komo meero nîwîrîyakexe kica. Roowo yosom wara marha nîmtapowaxe kopi. Ero wara nîmtapowaxe kica.

10 Ero ke yîhyaka so n̂etîramexe iyanan komo. Parakwe yawno yeetîkan̂e wara mak naxe.

11 On wara kexe cehcoyoponkaxmu komo, Ahce wa ma re kehtopo komo n̂een̂a Kaan awya so? Kenîn̂e ma re Mîk Kaan, Kyopono ro ha? kexe. Ero wa nîmtapowaxe kica.

12 Ero wa naxe Kaan ponarono pîn komo, ceserepokacho komo ken̂ehra ro mak naxe. N̂epamyasî mak emyawno komo.

13 Ero ke on wara tak wîhtînoi, Tohnaw ro mak oropotarî wakir̂wame ham okwe. Tohnaw kir̂wan̂he oyexi xe wai ham okwe, cesemokaxmu wara wasî kicicme oyehtoponho poko. Tohnaw mak ero wara wai ham okwe.

14 Ow penî reha kesemetanmekyasî ro mak kaamo poko okwe. Ow mîpanaresî enmar̂atîxera okwe, wîîkarî ha re.

15 Ero wara rma kîmtapotarî ha re. On wara tko wîhtînoyakn̂e hara, Ero wa omtapowataw amxîkrî komo yewkukman̂e me wasî kica, wîîkekn̂e.

16 Ero wa kicicme cehsom komo yehtopo ponaro wîxakn̂e. Keserepokekn̂e ro mak oyopo. Ahce kacho ero wa natu? wîîkekn̂e.

17 Ero yinhîrî Kaan mîn yaka kîwcekn̂e. Iito oyexitaw tak n̂examro yehtopo wîhtînoyakn̂e, eromanhîrî me ehtopo kom ha.

18 On wara tko n̂examro miir̂as Apa, tapeswem pona tîtosom me miir̂asî epîrkachome so tak. Mar̂mesî tak yîhcamnotopo komo cheka.

19 Ponan̂e rma n̂ehcamnoyaxe. Pona erahtîmtoponhîrî rma tak nasî aan̂e komo me ehcamnotopo komo pona.

20 Kwosotîmtoponhîrî wara rma n̂examro meen̂as Apa. Tpakache yaarono pîn me tak amna nîhtînoyasî tîn̂enthîrî rma twosoto. Ero wara rma n̂examro meen̂as Apa pakaxapu wara awexitaw, noro pîntho me n̂examro meen̂asî awosoto enxaputho wara.

21-22 Taa, ero wara ka wîxakn̂e, kahwokekn̂e ro mak ha ka okwe. Werewcekn̂e marha okwe ero wa oritopo. Ero wa oyexitaw tko camkî ro mak wîxakn̂e. Akpîra ro mak kesehtînoyakn̂e kica. Oknotho wara ro mak wîxakn̂e ahce na yîhtînon̂e pîn wara. Ero wara wîxakn̂e awero ro rma Apa.

23 Awakro rma tko wasî etowîn me ro mak. Oyamorî poko ow mecehcesî, kaari poko.

24 Ow ka mîweronomesî mîn hak poko. Pahxaro tak ow maar̂asî kir̂wanî ro pona okre.

25 Anarî ma re nai kah yawno ponaro oyehtopo Amoro pîn Apa? Pîra, exihra nasî. Tantono marha exihra nasî roowo pono yiixe xa oyehtopo. Amoro mak yiixe xa oyehtopo.

26 Anarimaw na keraswa hara ahce na pona. Kahwoke marha na okwe. Oropotarî karihton̂e rma tko Mîk Kaan. Oyemyawno me marha nasî Noro ehcamnopînî ro me ha.

27 Apa, amîtwono pîn komo waihyaxe okwe, ciin̂o yai rono komo. Noro yipu komo mîwaikesî.

28 Owî reha, tawake wasî Kaan mîtkoso owtoche. Pahxa rma Kporin komo pona ween̂akn̂e. Ero ke, Ero wara Kaan oriye okre, wîîkes Apa, mîk hak ya. Ero wa wekatîmyasî oritoponho awya.