Saromaw Wanorî On.

1 On wara wîîkes awya Apa, yuhnari yîhtînon̂e me awehtopo tîmko owya awara xa marha panatanmekno riin̂e me oyehtome. Kayaritomo mumuru ow Apa, kir̂wanî ro me awehtopo tîmko owya.

2 Ero wa oriche awya takîhso tak ayanan komo wen̂ekesî. Emetanmexapu komo wepanîyasî yaarono me xa. Ero wara ayanan komo wiir̂as Apa.

3 Ero yimaw tak îîpî komo rma nasî ayanan komo yereporen̂e me. Matîwîn komo marha nasî ereporen̂e me, kir̂wan me ciino rin̂e me cexirî ke.

4 Cesemetanmesom komo nukurunpesî kayaritomo, tmaywen kom ha. Emyawnomnî komo xîkrî marha nukurunpesî. Emetanmekn̂enhîrî pen komo yakuhr̂apon̂e wara kr̂a nasî.

5 Aponaro xa tak naxe n̂examro amn̂e. Pahkî nasî kaamo ehcamnopîra, pahkî marha nasî nuun̂i. Ero wicakî pahkînon aponaro naxe okre. Miya roro ehretawnomaxapu komo meero ero wara naxe apoko.

6 Kir̂wan̂he nasî tuuna cuupu pona tmohsom, yîhkotoxapu pona tmohsom. Ero wa nasî Noro amn̂e kayaritomo mumuru ha, tuuna wara nasî roowo tîhn̂e wara.

7 Kayaritomo me rma exitaw Noro ehn̂an me naxe kir̂wan komo. Cerepore so marha naxe miya roro, nuun̂i yehcamnotopo pona roro.

8 Miyan komo kayaritomon me rma nasî Noro, tuuna imo yecihtaka rorono komo kayaritomon me. Anarî marha nasî meyeno hara, ero yecihtaka rorono komo kayaritomon me marha nasî. Tuuna yepu yecihtaka rorono komo kayaritomon me nasî, roowo mapitaka rorono komo kayaritomon me marha nasî.

9 Axawa imo pono komo meero nutupenwaxe Noro mamakan me. Yiixatî pînînhîrî komo meero nutupenwaxe rowo cemeso ro.

10 Tupurantan komo n̂ekyaxe Tahsisi pono komo kayaritomo ya tîmsom. Kayaritomo komo rma mîkyam n̂ekyaxe. Meyeno komo kayaritomon marha cepethîkem n̂ekyaxe yîwya tîmsom. Saba pono komo n̂ekyaxe, Seba pono komo marha.

11 Noro yamrinaka nutupenwaxe kayaritomo komo ahnoro. Ahnoro mîk hak maywen komo naxe Noro maywen me.

12 Cesemetanmesom komo nakronomesî Noro, Kesemetanmekyas Apa okwe, ketaw ha tko yîwya. Ahce wa so na ehxapu komo nukurunpesî yukurumnînhîrî kom ha.

13 Kar̂pen komo pînîn yaw marha nasî, esemetanmexapu komo pînîn yaw ha. Esemetanmexapu komo n̂ecehcesî, waipîn me n̂iir̂asî.

14 Esemetanmekîra tak n̂examro n̂iir̂asî, waihkan me marha n̂iir̂asî. Tîpîn̂e xa n̂een̂asî noro yipu komo kamxukru. Ero wa nasî kayaritomo.

15 Pahkî kayaritomo me nasî Noro waipîn me. Ooru n̂ekyaxe Saba pononho yîwya tîmsom. Noro poko nîmtapowaxe roro maywen komo Kaan yakro. Kir̂wan̂he xa mai ham okre, kexe yîwya kaamo poko.

16 Puruma marha natîkwasî mer̂pora ro mak, ero warai marha natîkwasî anarî men hara. Îîpî meretwo so natîkwasî ocowo nwananîrî me. Ceperke marha nasî Ribanu pono wara. Mer̂pora n̂epamyaxe ewto pono komo. Cuupu wara n̂epamyaxe woskara pono wara.

17 Noro yosotî ponaro naxe tooto komo miya roro yîhcamnopîn me ro mak. Kaamo nasî pahkî ero wicakî pahkînon naxe osotî ponaro. Kayaritomo me exirî ke Noro miyan komo rma esemetanmekîra naxe. Kaanî nwakrerî xa Mîk ham, kexe tak n̂examro ahnoro mîk hak maywen komo Noro poko, kayaritomo poko.

18 Kir̂wan̂he Kporin komo yehtopo poko tîmtapotacerî ponaro Ixaw Yana yehtopo poko ha. Noro mak Mîk keserepokacho me ciino rin̂e.

19 Kyopono ro me cetacisom me tak n̂expe Noro miya roro yîtîhkan me ro mak. Kir̂wanî ro me Noro yehtopo n̂esenpope miya ro mak roowo poko hakno komo ya. Yaaro xa ero wa wîîkesî, yaaro xa ha.

20 Ero wa mak nas omtapotarî Kaan yakro. Tapi ow ha, Xese mumutho ha. Ero wa makî ka wîîkesî.