On wara wîîkes awya Apa, apona enîn̂e ow. Ero ke ehn̂an me cma re ow miir̂asî.

2 Ow yukurunpeko kir̂wanî ro me awexirî ke. Oyahsî xatî komo wahkotoko. Omtapotarî entakî Apa okurunpetome tak awya.

3 Toopu wara esko yaaka oyetkurunpetopo me. Ahyaka oyemaci xe wasî emapona roro. Awanton komo mantomai okurunpetopo poko. Toopu warai xa Amoro, pona oyececetotopo warai. Owacan warai marha Amoro, oyecen̂an warai ha.

4 Kaan Amoro, ponaro oyehtopo. Ow tak towko kicicme cehsom komo nahsîthonho. Oyahsîyatken̂e thakwa kicicitho komo, kîpînîn yawno pîn komo. Ero ke ow towko.

5 Kaanî xa Amoro Apa, Oporinî ro. Apona mak ween̂asî roro. Mehxa ro rma ow makronomekn̂e omrenai ro rma.

6 Oyewrutoponho n̂ixa ro rma ow mecehcekn̂e. Yememe ropotai oyewrunokan̂enho Amoro. Ero ke kir̂wan̂he awehtopo poko kîmtapowasî miya roro.

7 Opoko n̂eserepokexe mer̂pono pîn komo. Owacan warai rma tko Amoro yahcono warai.

8 Kir̂wan̂he awehtopo poko mak kîmtapowasî. Kir̂wanî ro me awehtopo wekatîmyasî kokmamso ro.

9 Owî cma re ahsîpînkara masî Apa, oporitomontache meero. Kar̂pera oyehtîkache tak ow ahsîpînkara rma esko.

10 Kicicme so nîmtapowaxe ooxatî pîn komo opoko. Owapanton̂e komo n̂esencexe owaikacho poko.

11 On wara kexe opoko, Noro pen tak nahsîpînkekn̂e Kaan ham. Ero ke kr̂a ahsîso kaikatko. Yukurunpen̂e exihra ro mak nasî, kexe.

12 Ero ke mooxe exihra esko Apa. Yohno cma re mîmokyasî oyakronomaxi.

13 Cehn̂axmu me mak n̂ehcowpe owaika xatî komo. N̂examro xa matko waihcowpe. Owîrîma xatî komo n̂ehcowpe poyino komo yetaporetopo me rma. Camkîno me kyam mak n̂examro enpoko.

14 Owî reha wasî oyakronomacho ponaro rma. Ero wara wasî miya roro. Kir̂wan̂he awehtopo poko kîmtapocetîkesî miya roro.

15 Kir̂wanî ro me awehtopo wekatîmyasî. Awya okurunpetoponho wekatîmyasî kokmamso ro. Atî wicakî rma ka nai okurunpetopo awya, yîhtînopîra wasî.

16 Ahna na owcetaw Apa, awya okaritotopo rma nasî oyan̂e me. Kir̂wan me kiin̂e me awehtopo wekatîmyasî. Awehtopo mak wekatîmyasî anarî yehtopo pîn.

17 Omrenai ro rma ow mîpanatanmekyakn̂e Apa. Ero ke wekatîmyasî rma oroto cirihn̂i ciitoponho awya.

18 Oporitomontache meero ow ahsîpînkara ro mak esko Apa, tumutwe ohpoci exitaw tak. Owî rma ecehtoko opoyino komo ya oyesekatîmtome, kar̂pe xa awehtopo yekatîmtome ha. Amna yepamtho ya marha ekatîm xe wasî kar̂pe xa awehtopo.

19 Amna yopo ro mak nasî kir̂wanî ro me awehtopo Apa. Kah yaka rorono me nasî ero wa awehtopo. Amna n̂eserepokesî ro mak an̂irithîrî poko. Onoke ma re nai awarai Apa?

20 Cesemetanmesom me xa ow miir̂akn̂e ham okwe. Amoro rma tko ow menpakes hara amn̂e. Yuhnawnonhîrî ow manîmyas hara.

21 Ero yimaw takîhsom me xa tak ow menpesî. Ow mahworetîkesî xa tak ero yimaw.

22 Apoko kewanomes Apa. Raatî yakro kewanomesî sawteriu yakro. Kemîknon̂e pînî ro me awehtopo poko kewanomesî. Ahpa yakro marha kewanomesî kir̂wan̂he awehtopo poko. Kir̂wanî ro xa Amoro Apa, ponaro Ixaw Yana komo yehtopo ha.

23 On wara was apoko oyewanometaw, kemtarakesî ro mak tahwore oyexirî ke. Ero wa wasî oropotaw anakir̂wamathîrî me oyexirî ke.

24 Kokmamso ro awehtopo poko kîmtapowasî, kir̂wanî ro me awehtopo poko. Oyemetanmekî xatînhîrî komo mehn̂anmekyakn̂e. Tîhyapamso tak naxe. Ero wa ow mepanîyakn̂e Apa.