70
Waano Yaan̂e N̂enîrî On, Tapi Wanorî Yiixe Ehtopo Pokono. Ooxatî Pîn Komo Ehn̂anmeko Apa, Kesî Tapi
1 Apa, on wara cma re wîîkes awya, Kaan Amoro. Yohno cma re mîmokyasî okurunpeso. Yohno cma re mîmokyasî oyakronomaxi. Oporin xa Amoro.
2 Owaika xatî komo ehn̂anmeko, camkîno me marha cirko. Oyemetanmekî xatî komo porohkakî. Camkîno me tak cirko.
3 On wara marha ciino cirko, Ai okre, kan̂e komo opoko, tanme ro so tporohsom me cirko tîhyapamrî ke so.
4 Awenî xatî komo reha cirko tahwotaxmu me. Tawake cirko apoko. On wara cirko tukurunpen̂e me awenîn̂e komo, Karitî xa Mîkî Kaan, tîtkacerî, kan̂e me cirko.
5 Ahwora rma tko was Apa, kesemetanmekyasî. Ero ke yohno cma re mîmokyas ohyaka. Oyakronoman̂e ro xa Amoro, okurunpen̂e marha. Ero ke ecmamra cma re mîmokyasî. Ero wa cma re masî.