Waano Yaan̂e N̂enîrî On, Tapi Wanorî. Epemrutun Kacho Me Taasom On.

1 On wara wîîkes awya Apa, ow anîmko. Kenor̂asî mak tan okwe. Oyexenari tak n̂ehtîkesî tuuna okwe.

2 Apacakrî kwaka kemihcasî, oyececetotopo exihra ro mak nas okwe. Yuhnaka ro mak kenor̂asî okwe weyun yaka, yukmarî warai kwaka okwe.

3 Kekar̂kesî ro mak tak okwe pahkî omtapotarî ke. Ow akronomatamko, karî ke ha. Kexeturpam tak okwe. Kesewkesî marha tak okwe ponaro oyehtopo momokrî ke pahkî.

4 Mer̂pora ro mak naxe ooxatî pîn komo. Tohnaw ro mak ooxatîmnokexe okwe. Ohpoci yakenon yopo ro mak naxe, ohtîpîrî pokono yopo. Kar̂pe ro mak naxe tohnaw ooxatîmnokan̂e komo, owaika xatî kom ha. Tîmko hara men, kexe thakwa owya, on̂en̂epanmekîtho pîn poko rma.

5 Akpîra cehsom me oyehtoponho meen̂as Apa. Ceyamso exihra nasî kicicme oyehtoponho.

6 Kaan xa Amoro Apa, kantoman̂e ro. On wara exi xera ro mak wasî aponarono komo, tîhyapamso exi xera so wasî akpîra oyesehtînotopo yanme kica. Cesewkukmaxmu me exi xera so ro mak wasî awenî xatî komo kicicme oyehtopo yanme. Kaan xa Amoro, ponaro Ixaw Yana komo yehtopo ha.

7 Owîrîyakexe kica anarî komo aponaro oyexirî ke. Kîhyapamyasî okwe, kesewyahruyasî mak.

8 Tîyanan pîn me oyen̂axe oyakno ro komo rma. Anarî yana me oyen̂axe yememe xîkrî komo rma okwe.

9 On wara mak was Apa, kir̂wan̂he ro mak exi xe wasî amîn. Ero wa exi xe ro mak wasî. Oyopo ro mak wasî ero wa exi xe. Awîrîyaketaw aaxatî pîn komo ya owîrîyakacho me rma nasî.

10 Anarimaw so kîwracesî, eseresmara marha wasî pahkî. Ero wa oyexirî poko rma owîrîyakexe okwe.

11 Kumixitho mak wamruyakn̂e oponon me. Ero poko marha n̂etaporexe opoko kica.

12 Ewto potaw ceremaxmu komo owîrîyakexe kica. Wenîmxapu komo n̂ewanomexe opoko kica.

13 Awakro tko kîmtapowas Apa wakreno ritopo me rma ka exitaw. Kwakren̂e ro xa Amoro Apa. Ero ke omtapotarî cma re mencesî. Ehn̂ara yukurunpeno rin̂e Amoro. Ero ke ow yukurunpeko.

14 Apacakrî chei ow anîmko emicira oyehtome okwe. Ooxatî pîn komo wahkotoko oyahsîso mokyataw so. Yukmarî kwawno wara wasî. Ero ke ow anîmko.

15 Ow enorinokara ro mak esko yukmarî kwaka. Weyun yaka ow enorinokara esko. Etahrura cirko ewtarî ero yaw oyexitaw.

16 Ow eyuhko Apa kakronoman̂e me awexirî ke. Kîpînîn yawno ro xa Amoro. Ero ke owece tak etaknamakî.

17 Esewyahrura esko oyenîkara tak awehtome. Awanton ow. Ero ke yohno cma re ow meyukyasî. Kesemetanmekyasî thakwa okwe.

18 Ohyaka amoko okurunpeso. Ooxatî pîn komo ya cma re oyahsîpora masî.

19 Opoko ewretopo komo rma mencesî, opoko etaporetopo kom ha. Owîrîyakacho marha mencesî. Awero ro wa naxe ooxatî pîn komo ahnoro.

20 Kahwoketîkekn̂e owîrîyakarî ke yîwya so. Kar̂pera wehtîkekn̂e okwe. Opînîn yawno komo cma re wepor̂akn̂e. Okwe, opînîn yawno yenîhra ro mak wîxakn̂e okwe. Oyahworen̂e wepor̂akn̂e ha re. Exihra ro makî tko xakn̂e okwe.

21 Onahrî cheka n̂esmetken̂e okno yerexkutho kica. Owokru xe oyexitaw kawawano ke mak owokpetken̂e kica.

22 Ero ke n̂examro yeseresmetaw yînahrî komo rma tak cirko yîwîrîman̂e komo me rma. Cemyawnoi xa ehtopo komo rma cirko emcinon̂e komo me hara.

23 Cewxîrpe tak cirko enîhra ro mak tak ehtome so. Tîhretatan̂em me roro mak tak ciino cirko.

24 Arwonîmko ro mak n̂examro poko. Cerewre ro mak n̂expe arwon, n̂examro pen yahsîn̂e wara ro mak n̂expe.

25 Pohra tak n̂expe ekenhîrî komo. Yarîhra marha tak n̂expe yîmînthîrî komo.

26 An̂emetanmekîthîrî komo n̂emetanmekyaxe xa hara kica. An̂erepethîrî komo poko nîmtapowaxe kicicme so kica.

27 Ero ke pona so rma cirko kicicme ehtoponhîrî komo. Asakro tko cirko ero yipu n̂examro pona. Kir̂wanî ro me awehtopo cirihra ro mak esko n̂examro pona.

28 N̂examro yosotî kr̂a yickakî akaritan yaw mewrexapu. Waipîn komo Yosotî Tan, kacho yaw mewrexapu ha. Kir̂wan Komo Yosotî Tan, kacho yaka mewrera ro mak esko. Ero wa ooxatî pîn komo cirko Apa.

29 On wara tko was owî reha, kerewasî ro mak oko, kahwokesî marha okwe. Ero ke ow akronomakî. Kawno ponan wara ow cirko, îîpî ponan wara.

30 Kir̂wanî ro mak mîn Kaan yosotî, wîîkesî oyewanomarî me. Kir̂wan̂he xa mai ham Apa okre, wîîkesî marha.

31 Ero wa oyewanomarî n̂encesî Kporin komo tîn̂entarî mexe xa okre. Oyokutho punu rma re wakn̂iyasî, bui pun. Tmeretkem mîk noro yipu, tîhroxoxoyem marha mîk. Ero yipu yakn̂iyataw owya Kaan ya tîmsom me, tawake n̂he rma cik nasî. Kir̂wan̂he xa tko nasî yîwya Noro yehtopo poko oyewanomatopo.

32 Ero wa oyewanomarî n̂encexe, Kaan mamawno me cesehtînosom komo, Tawake naxe entarî ke. Tahwore xa maxe amyamro, Kaan yenî xatî komo.

33 Esemetanmexapu komo mtapotarî yentan̂e Mîk Kporin komo. Tîyanan komo yîwîrîyakara ro mak nasî kahrutopo yawno komo.

34 Kporin komo poko nahwotacowpe kah yawno komo, roowo pono komo marha, tuuna imo komo marha, ero kwaw tîtosom komo marha. Noro yipu komo nahwotacowpe Kporin komo poko.

35 Siaw rma n̂ecehcesî Kaan. Xuta yepamtho komo yewtontho pona tak mîîmo komo n̂iir̂as hara. N̂examro tak n̂esekenmexe iina. Ewton komo me tak nas ero.

36 Ero tak nahsîyaxe amn̂e Kaan yanton komo yepamtho cewton komo me. Kaan yosotî xatî komo yeken me nasî. Ero wa nasî.