Waano Yaan̂e N̂enîrî On, Tapi Wanorî.

1 On wara wîîkesî Kaan poko, nawomhe tak Noro tîîxatî pîn komo yakpachome. N̂examro pen weken̂emekn̂e me tak n̂expe.

2 Apa, on wara wîîkes awya, wehto yîsîn naar̂asî ocowo ero wa xa marha aaxatî pîn komo en̂epeko. Maan̂i nuxukrapamyasî wehto yepona ciriche ero wa xa marha kicicme cehsom komo waihcowpe hara Kaan yanme.

3 Tawake reha n̂ehcowpe kir̂wan komo. Nahwotacowpe xa tak Kaan n̂enîrî me. Miya xe xa nahwotacowpe.

4 Ero ke Kaan poko ewanomacoko. Noro yosotî poko ewanomacoko. Kir̂wan̂he Noro yehtopo poko amtapotacoko, kaapu smunu mkaw tîtosom yehtopo poko ha. Kporin komo Kaan Mîk Noro yosotî. Noro yeepataw ahwotacoko.

5 On warai Mîk Kaan, yîmîhnî komo yîîm Mîk ha. Wooxam komo kurunpen̂e marha Mîkî, iin̂o waixapu komo kurunpen̂e ha. Ero wara nasî Kaan cekenî ro pono ha.

6 Cewyarono komo yepamnon̂e Mîk Kaan. Kahrutopo yawnonho komo yen̂emhatakan̂e marha Mîkî. Cemyawnoi so tak noro yipu n̂iir̂asî. Anwekn̂e komo reha naxe anarî roowo pono me, kaamo n̂ipikatho pono me mak okwe.

7-8 On wara mîxakn̂e Apa pahxa, ayanan komo poturme mîîcekn̂e. Pohnîntari awcetaw n̂esewsîyakn̂e roowo. Tuuna mokyakn̂e kah yai iito awexirî ke. Kaan xa Amoro Sinai pono, ponaro Ixaw Yana komo yehtopo ha.

9 Tuuna mekmexpekn̂e Apa mer̂pono pîn. Ero ke rma arowon pono komo mexporekn̂e pokaxapunhîrî.

10 Ero pona tak n̂esekenmetken̂e ayanan komo. Mer̂pora ro mak nasî ahce na mko, kîrwanî mko xa ahyaw Apa. Ero poi rma cesemetanmesom komo ya mîmyakn̂e yiixe ehtopo komo.

11 Tîmtapotarî n̂ekatîmyakn̂e Kporin komo. Mer̂pora ro mak xatken̂e entan̂e komo. N̂examro tak n̂ekatîmyatken̂e, miya so nakpayatken̂e.

12 On wara kacho nakpayatken̂e, Kayaritomo pen komo tak n̂emahciyaxe kar̂pe. Sowtatu komo yakro rma n̂emahciyaxe. Emyawnonhîrî komo tak nahsîyaxe wooxam komo, yîmînthîrî komo yawno ha.

13 On wara kesî Kaan takrono komo ya reha, Kahn̂eru mîn mîtkoso mak na metakriyatu. Cenpore rma tko maxe. Potkuku yaporî wara maxe prata ke yîmkarinomaxapu wara. Ahnoro noro yipu poci yawno wara maxe ooru ke yîmkarinomaxapu wara.

14 Kayaritomo pen komo nakpayakn̂e Kaan, Karitî Ro. N̂examro yakpetaw n̂eepe wara xatken̂e, Sawmon pona mohxapu wara.

15 Kaan yeken me nasî îîpî mko, Basan pono mko. Tpotuciciy so nasî iitono mko îîpî.

16 Anarî komo rma re naxe tpotuciciy so îîpî mko. Ero ke on wara wîîkesî yîwya so, tpotuciciyemu mko ya hara, Ahce kacho arwon me so mîpohnatu ero poko? Cekenî ro me xa mîn men̂ekekn̂e Kaan îîpî. Iina n̂esekenmesî, iitono ro me tak nas amn̂e Kporin komo eroromero.

17 Mer̂pora ro mak nasî Kaan tararan, 20.000. Ero yopo xa matko naxe mer̂pora ro mak. Yîchew so nasî Kporin komo. Sinai tak n̂iir̂asî cekenî ro me.

18 Kah yaka awcetaw Apa anahsîthîrî komo maar̂akn̂e awakro. Tooto komo mahsîyakn̂e awya tîmsom me. Cetanwesom komo meero mahsîyakn̂e. Ero yipu mahsîyakn̂e yîcheka so tak awesekenmachome. Ero wa mîxakn̂e Apa.

19 Kir̂wan̂he xa Kporin komo yehtopo poko tahwotapore nasî. Kakronoman̂e xa Mîk Kaan. Tawsîn̂em yaan̂e wara taxe anarimaw. Ero yipu yaan̂e me rma nasî Kporin komo kakro ro so. Enmar̂atîxera naar̂asî.

20 On wara marha nasî Kaan, ponaro kehtopo komo, kukurunpen̂e me nasî. Kporin komo Mîk Kaan. Kwaihtopo komo yesakan̂e me xa kiir̂axe so Noro.

21 On wara men nasî Kaan amn̂e, tîîxatî pîn komo kanakatapesî oko. Tîhpoxem pen komo kanakatapesî, cetanwesom me cehtoponhîrî poko epanatanmekpon pen kom ha.

22-23 On wara kesî Kporin komo, Noro yipu komo wekyasî Basan pononho komo. Tuuna imo kwawnonho komo marha wekyasî ahtarî komo yukpachome tak aaxatî pînînînhîrî pen komo kamxukutho kwaka. Yupunthîrî komo marha tak non̂esî awoh komo xapari, kesî.

24 Awenarino komo tak n̂esenpexe Apa. Tmaywei xa mîîcesî amînî ro yaka. Ponaro oyehtopo Amoro, okayaritomon ha. Noro yipu mîîcesî amînî ro yaka n̂examro yakro.

25 Apoturme cexe cewanomaxmu komo. N̂examro mahyaw tak cexe raatî yorkan̂e kom hara. Iyorkan̂e komo yakro rma cexe emasî komo, maraka pokono kom ha.

26 Kir̂wan̂he Kaan yehtopo ekatîmcoko esenmexapu komo ya mer̂pono pîn komo ya. Kir̂wan̂he nai ham okre Kporin komo, kacoko Ixaw Yana komo ya, esenmexapu komo ya.

27 Iito marha naxe Benxamin yepamtho komo cesenmesom komo yaan̂e me. Asak makno mak mîkyam Benxamin yepamtho komo. Akro so marha cexe Xuta yepamtho yaan̂e komo. Akro so marha cexe Seburon yepamtho yaan̂e kom hara, Nahtari yepamtho yaan̂e komo marha.

28 Ekaritoko xa tak Apa. Kar̂pe awehtopo xa enpoko amna ya pahxa menpekn̂e ero wa xa marha.

29 Xerusaren po exirî ke amîn, iina awya tîmsom komo n̂ekyaxe amn̂e kayaritomo komo.

30 Kamara warai komo eiko tuuwa chewno. Bui warai komo marha eiko. Paaka xîkrî chewno eiko, anarî yana komo chewno ha. Ero wa awya eiche amamawno me tak naxe. Awya tîmsom tak n̂ekyaxe prata. On wara naxe anarî yana komo, tpoxwe nîhtînoyaxe waapa me tîtotopo komo kica. Noro yipu komo akpakî.

31 Kayaritomo maywen komo mokyaxe amn̂e ahyaka, Exitu pono komo. Yohno Eciopia pono komo tak napockanwaxe Kaan wece Noro pona enîn̂e me.

32 Kaan poko ewanomacoko roowo pono komo, mîk hak maywen kom ha. Kporin komo poko ahwotacoko waano ke rma.

33 Kah yaw tîtosom Mîk Kaan mehxan yaw, pahxa akîhtoxapu yaw. Kar̂pe marha nasî yîmtapotarî. Noro poko xa ewanomacoko.

34 Kar̂pe Kaan yehtopo poko amtapotacoko. Ixaw Yana komo kayaritomon me n̂esenpesî. Kar̂pe Noro yehtopo n̂esenpesî kah yaw.

35 Kopi kacho me ro mak mas Apa. Ero wara mesenpesî amîn yaw rma. Tîyanan komo karihcesî Kaan, ponaro Ixaw Yana komo yehtopo. Ero ke kir̂wan̂he xa Kaan yehtopo poko ahwotacoko. Ero wa xa ehcoko.