Waano Yaan̂e N̂enîrî On Waano. Raatî Yakro Taasom On, Tîyorkaxmu Yakro.

1 On wara exi xe wasî Kaan kpoko so, Kîpînîn yaw so exi xe wasî. Kakronoma xe so marha wasî yîwya. Cewtawake xa exi xe wasî kpoko so.

2 Ero wa cma re mas amna poko Apa awehtopo yesenpotome roowo pono komo ya. Kakir̂waman̂e me awehtopo yenpo xe wasî mîk hak rowon pono komo ya, roowo poko hakno komo ya rma.

3 Kir̂wan̂he awehtopo poko xa nahwotacowpe Apa anarî yana komo. Ahnoro ro mak nahwotacowpe kir̂wan̂he xa awehtopo poko.

4 Tahwore n̂ehcowpe mîk hak rowon pono komo, n̂ewanomacowpe tahwore cexirî ke so. Takîhso xa roowo poko hakno komo yen̂ekan̂e me mas amn̂e. Ahnoro roowo pono komo kayaritomon me masî. Ero ke tahwore xa n̂ehcowpe mîk hak rowon pono komo apoko.

5 Kir̂wan̂he awehtopo poko nahwotacowpe Apa anarî yana komo. Ahnoro xa nahwotacowpe kir̂wan̂he xa awehtopo poko.

6 Ero wa apoko ahwotache so tak n̂eperwasî knatîrî komo, kmararîn pono komo. Miyan ke rma tak kwakrexe so Kaan. Ponaro kehtopo komo Noro.

7 Kakronomexe so tak Kaan. Ero ke Kaan ponaro xa tak naxe miyan komo rma roowo yenatîtopo pono komo meero. Ero wa naxe.