Waano Tan, Waano Yaan̂e N̂enîrî.

1 Oyakno komo, on wara wîikes awya so roowo poko hakno komo ya ahnoro, Kaan poko ahwotacoko. Emtarakacoko ro mak awahwowataw so.

2 Kir̂wanî ro mîn Kaan yosotî. Ero ke Noro poko ewanomacoko. Tahwore xa ekatîmcoko kir̂wan̂he Noro yehtopo.

3 On wara kacoko Kaan ya, Apa, n̂eserepokesî ro mak amna cirihnî ciitopo poko awya ciino ritoponho yentache. Karitî xa Amoro. Ero ke awewetîn̂e me naxe amn̂e aaxatî pînînhîrî komo.

4 Amna Porinî ro Amoro, kexe amn̂e roowo poko hakno komo ahnoro. Apoko nahwowaxe. Awosotî poko n̂ewanomexe kir̂wan̂he ro mak awexirî ke.

5 Keserepokacho ro mak mîn Kaan ya cirihnî ciitopo. Entamcoko xe.

6 Tuunanhîrî n̂iir̂akn̂e yarinho me. Tuuna yepu wacetken̂e iyanan komo tîhtarî komo po rma. Iito tak tahwowatken̂e Noro poko.

7 Kayaritomo me nasî Kporin komo eroromero. Kar̂pe xa cexirî ke ero wa nasî. Mîk hak maywen komo yenîn̂e me nasî. Ero ke tpoyino komo yopono me esenpora ro mak n̂ehcowpe Noro yanwekn̂e komo.

8 Anarî yana komo, awya so meero wîîkesî, Kaan poko ahwotacoko, poko amna yehtopo poko ha. Kir̂wan̂he ehtopo ekatîmcoko miyan komo n̂entarî me.

9 Waipîra amna n̂iir̂akn̂e. Amna tarî marha n̂ecehcekn̂e sehrere kahra ehtome.

10 Amna yehtopo mukukmekn̂e Apa, Kir̂wan̂he na natu, kachome. Amna musmunkekn̂e prata nusmunkexe ero pokono ro komo ero wara.

11 Amna memcinoyakn̂e mîîye warai yaka. Amna mkahsî tawsîn̂em makriyakn̂e.

12 Amna yepore cekn̂e kawaru mkawno komo awanme. Amna cekn̂e wehto chere, tuuna kwaw marha. Ero yinhîrî amna maar̂akn̂e kir̂wan pona tak, cemyawnoi xa amna yehtopo pona xa.

13 Amîn yaka kmokyas Apa. Oyokutho pun wekyas iina awya tîmsom, yîmton me takn̂isom ha. Ero yipu men wîmyas awya, kachonho yaw roro rma wîmyasî.

14 Oyesemetanmekyataw ka kîmtapowakn̂e awakro awya tîmsom poko. Ero men wîmyas awya amn̂e, wîîkekn̂e. Ero wa kachonho yaw roro rma tak wîmyas awya Apa.

15 Oyokutho pun marha wakn̂iyas awya tîmsom me, tupurukyem pun. Kahn̂eru pun wîmyas awya, bui pun marha. Kabritu pun marha wîmyas awya. Ero wa oyehtopo tpoxwe nas awya Apa.

16 Taa, oona ka amohcoko amyamro Kaan poko tweeno komo. Omtapotarî yentaxi amohcoko. Kaan ya owakrechonho wekatîmyas awya so.

17 Noro yakro kîmtapowakn̂e oyakronomacho poko. Kir̂wan̂he Noro yehtopo poko marha kîmtapowakn̂e.

18 On wara nasî Kporin komo, kicicme oyehtoponho yîmcetaw rma oropotaw ketaw ha re omtapotarî yentara nas okwe.

19 Omtapotarî rma tko n̂encekn̂e Kporin komo. Ow cma re makronomesî, kacho ponaro nasî, omtapotacho ponaro.

20 Kir̂wan̂he xa Kaan nai ham okre. Omtapotarî yanwekîra xakn̂e. Opînînkara ro mak xakn̂e ham. Ero wa xakn̂e okre opoko.