Waano Yaan̂e N̂enîrî On, Tapi Wanorî

1 On wara tak mences amn̂e Apa Siaw pona amokuche, Kir̂wan̂he mai ham okre, kacho mencesî. Ero yimaw marha tîmtapotachonhîrî yaw roro tîmsom amna nîmyas awya.

2 Awakro amna mtapotacho yentan̂e ro Amoro Apa. Ero ke awakro yîmtapotaxi mokyaxe miyan komo rma ahnoro.

3 Kicicme amna yehtoponho nasî amna yar̂man̂e me okwe. Ero ke amna ya awanwetoponhîrî cma re mîhcamnoyas Apa.

4 Amînî ro yaw mas Apa. Tawake xa nas amna iina tmohsom me anmen̂ekathîrî kaxi. Ohyawno me ehcoko, mîîkesî amna ya. Cerepore kehtopo xa mîn amîn ha, kir̂wanî ro me exirî ke. Cerepore amna nas iito.

5 Amna mtapotarî meyukyas Apa, cirihnî ciitopo ke. Kir̂wanî ro me awehtopo menpesî. Yaaro tko panareno miir̂asî. Amna yakir̂waman̂e xa Amoro Apa. Apona n̂een̂axe mer̂pono pîn komo, roowo yenatîtopo pono komo meero ahnoro, tuuna imo kwawno komo marha, meyeno kwawno komo xa.

6 On wara mîxakn̂e Apa, îîpî makîhcekn̂e kar̂pe awexirî ke. Kar̂pe awehtopo mamruyakn̂e aponon wara.

7 Tuuna imo mîtîtîrekn̂e cewtun̂emînhîrî, esewcokocokomaxapunhîrî. Anarî yana komo mîtîtmamnoyakn̂e wara ro mak kan̂enho komo. Ero wara menpesî kar̂pe awehtopo.

8 Meyeno komo n̂eraswaxe ero wa awesenporî ke. Enmayataw, kokmamyataw, ero yimaw so n̂examro miir̂asî tahwotaxmu me xa.

9 On warai marha Amoro Apa, roowo ponarono Amoro. Mîhyasî roro, mîpoxuresî marha. Nasî marha tuuna yepu komo an̂irithîrî, tukmaxi nasî amna natîrî yatîkren̂e me. Raixi warai komo, puruma komo, ero yipu yatîkren̂e me nasî.

10 Tuuna mekmexpesî pomoxapu tîhtopo, yuturunu komo mîmemehseresî marha. Tuuna ke marha roowo mucukmaresî. Ero wa amna natîrî matîkresî epetachome tak okre.

11 Tînahke xa amna miir̂asî cimn̂i yimaw, kaamo yimaw marha. Awesamarî yaw so nas amna nahrî mer̂pora ro mak okre.

12 Cuupu marha natîkwasî mer̂pora pohnîntaw. Tahwotaxmu warai me nas okre cuupu îîpî komo pono.

13 Kahn̂eru pen marha naxe woskara po so. Woskara ponon wara mak naxe okre. Îîpî yamrinaw so nasî puruma komo, raixi warai komo. Poono wara xa marha n̂esenpesî ero hara. Ero wa exirî ke tahwotaxmu wara nasî îîpî yamrinawno, cewanomaxmu wara xa nasî. Ero wa nas awanme mak Apa.