Waano Yaan̂e N̂enîrî On, Tapi Wanorî.

1 Kîmtapowasî awakro Apa. Ero ke omtapotarî cma re mencesî. Ahwora ro mak oyehtopo tan wekatîmyas awya. Kwaihkesî kr̂a, kexe ooxatî pîn komo owya okwe. Ero ke owaikapora cma re masî yîwya so okwe.

2 Owaikacho poko n̂esencexe kicicme cehsom komo. Wara ro mak kexe kicicme ciino rin̂e komo. Ero ke ow eyamko yîn̂entorî me so.

3 Tun̂uru komo yohton̂e wara naxe kacipara imo yohton̂e wara. Tîmtapotarî komo nar̂mexe tooto wece waiwî wara oko. Cerewrem xa mîn yîmtapotarî komo.

4 Kicicme exihnî komo rma wapancexe. Peen chew so n̂eseyamyaxe wotohme so oko. Ponan̂e rma wexe twerîhra ro mak okwe.

5 Takrono komo wakpamnoyaxe kica emetanmekno ritopo poko. Mîîye warai yeyamtopo poko n̂esencexe, kir̂wan komo yemcinotopo poko. Onoke ma re kn̂eyamthîrî n̂een̂a? kexe okwe.

6 Kicicme ciino ritopo poko n̂esencexe. Ero wa xa ham, ehn̂an me tat ham okre, kexe mak kica. Yuhnari xa nasî noro yipu komo yîhtînotopo, ahce wa na kiri xe ehtopo komo pokono ha.

7 Waiwî ke won̂e komo wara tko nasî Kaan. Ponan̂e rma twoso naxe oko.

8 Yîmtapotachonhîrî komo rma Kaan n̂iir̂asî yîwîrîman̂e komo me okwe. Yîwîrîmachonhîrî yenîn̂enho komo tak n̂epanamexe ceserepokarî ke so. Ahce okwe, kexe.

9 Ero ke twerî tak naxe miyan komo rma amn̂e. Kaan ya waihkano ritopo tak n̂ekatîmyaxe anarî komo ya. Ero wa ciino rin̂e me Kaan yehtopo poko n̂esehtînoyaxe takîhso.

10 On wara reha naxe kir̂wan komo, Kporin komo poko nahwowaxe. Noro pona xa n̂een̂axe. Kir̂wan̂he Noro yehtopo poko nîmtapowaxe kir̂wan̂he cexi xatî komo ahnoro. Ero wara naxe.