Apa, ponaro oyehtopo xa Amoro. Awenî xe ro mak wasî. Owokru xatî wara wasî oropotaw awenî xe. Opun meero amîtwo cexi xe ro mak nasî. Tuuna ken̂arî pîn pono wara ro mak was okwe. Twokru xatî wara marha nasi oyeken. Ero wa was Apa.

2 Amîn yaw oyexitaw awehtopo ween̂asî. Kar̂pe awehtopo weenasî, kir̂wanî ro me awehtopo marha.

3-4 Tpoxwe rma re nasî kar̂pe oyehtopo. Tpoxwe xa tko nasî awya owakrecho. Ero ke kir̂wan̂he xa awehtopo poko kîmtapowasî. Miya roro kîmtapowasî kir̂wan̂he awehtopo poko owaitopo pona roro. Ayanan me oyexirî ke kapockanwasî.

5 Apona kerepowasî, kasom yonon̂e wara xa was okre cerepore. Tahwore xa kîmtapowasî kir̂wan̂he awehtopo poko.

6 Okuywan po rma oyexitaw aponaro wasî. Kosope meero aponaro wasî rakatawro, enmaporo marha.

7 Oyakronoman̂enho Amoro. Ero ke kahwowasî awaporî yawarpan makataw oyexirî ke.

8 Awenari xa kmokyasî meyehra. Awamorî ke ow mecehcesî kaari ke.

9 Ero warahra naxe owaika xatî komo. Noro yipu komo reha cexe roowo yatumnaka mak okwe.

10 Kacipara ke twaihkaxmu me waihyaxe okwe. Kamara warai yotî me marha naxe okwe.

11 Kayaritomo reha nahwowasî Kaan poko. Kaan yetacin̂e komo marha nahwowaxe Noro poko, yaaro tîmtapotacho kuknon me etacin̂e kom ha. Cemarontaxmu komo yîtîtmamnorî ke Kaan ya n̂examro nahwowaxe. Ero wa naxe.