62
Tapi Wanorî On, Waano Yaan̂e N̂enîrî, Xetutun N̂enîrî Kaan Pona Ceserepotanmesom Ow Ha, Kesî Tapi
1 On wara wîîkes awya so, Kaan pona mak ceserepotanmesom xa ow ha. Ero ke tîtken̂e mak wasî. Noro xa nasî oyakir̂waman̂e me.
2 Noro xa Mîk toopu warai oyapon warai. Noro mak nasî okurunpen̂e me. Owacan warai marha Mîk. Ero ke ahwokan me ro mak wasî.
3 On wara wîîkesî ooxatî pîn komo ya, Atî wicakî pahkî oyakro metar̂met okwe? Amyamro pen tak maxe twaihkaxmu me amn̂e okwe. Mîîmo wacan wara mak maxe emacakaporono wara okwe. Paaka wacan wara marha maxe cewananîhsom wara.
4 Tîyopono komo me oyexirî ke roowo pona oyar̂matîka xe mak nat ham okwe. Nahwowaxe marha cemaro poko kica. Awakre xe wasî Kaan ya, kexe rma re tîmtapotarî ke so mak. Tîropotaw so reha anarme nîîkexe. Awîrîma xe kr̂a wasî Kaan ya, kexe hara okwe tîropotaw so. Ero wa naxe ooxatî pîn komo.
5 Owya rma wîîkes on wara, Kaan pona xa enko tîtken̂e mak, wîîkesî. Noro mak oripe tanmero, wîîkesî marha.
6 Noro mak nasî oyapon me toopu warai me. Noro mak nasî oyakir̂waman̂e me, owacan me marha. Ero wa exirî ke ahwokan me ro mak wasî.
7 Kaan mak nasî oyakir̂waman̂e me. Noro poko marha kahwowasî. Toopu warai Mîk porin warai. Karpe orin̂e Mîk Kaan. Noro yaka mak ketkurunpesî.
8 Oyakno komo, on wara wîîkes awya so, Noro pona encoko ahce wa so na awexitaw so. Ahce wa na awehtopo komo ekatîmtîkacoko yîwya. Kukurunpen̂e ro komo xa Mîk ha.
9 On wara naxe tpoyino xawyakan komo, kaweresî wara kyam mak naxe. Iyopono me cehsom komo reha naxe cemaro wara mak. Awsîn komo yukuknometaw awsîmnî me ro mak naxe okwe. Asakno roro rma naxe kaweresî wara kyam mak.
10 On wara kahra ehcoko, Yupurantankano kr̂a wiir̂asî tupurantai tak oyehtome, kahra ehcoko. Emyawnano poko ken̂epanasî cemyawnoi oyehtome okre, kahra marha ehcoko. Awemyawno komo yepamche meero tîpîn̂e xa enîhra ehcoko.
11-12 Kaanî mtapotarî wencekn̂e on wara ehtopo pokono. Asak hakno pokono tko wencekn̂e yîmtapotarî. On wara wencekn̂e, Karitî xa Mîk ha Kaan, kacho wencekn̂e. Kîpînîn yawno marha Amoro Apa. Kepeman̂e ro me masî kehtoponhîrî komo yaw roro. Ero wa kacho marha wencekn̂e. Ero wa awehtopo pokono wencekn̂e Apa.