Waano Yaan̂e N̂enîrî On. Kaanî Mtapotarî Nasî Epemrutun Wara, Kacho Me Taasom On. Tapi Wanorî On Miktan Me Taasom, Kpanatanmetopo Ha. Aram Naharain Komo Yakro N̂etar̂mekn̂e Tapi, Aram Soba Komo Yakro Marha. Xoabe Marha Tî N̂etar̂mekn̂e Tmokyataw Hara. Eton Pono Komo Tî Nar̂mekn̂e Yîmîtî Ken̂arî Po, Îîpî Yamrinaw.

1 On wara wîîkes awya Apa, amna mahsîpînkekn̂e ham okwe. Amna macakan̂e wara mîxakn̂e okwe. Ahwora ro mak mîxakn̂e ham amna poko. Ero ke on wara wîîkes awya, amna cma re makir̂wames hara.

2 Roowo tak miir̂akn̂e cesewsîsom me. N̂etîmtakekn̂e marha tak esewsîrî ke. Ero ke tak etîmtakaxapu komo ahruko hara esewsîra tak ehtome.

3 Ayanan komo yahwokacho xa mekmexpekn̂e. Amna wokpan̂e wara mîxakn̂e kawaxiyem ke. Ero ke epîrkaporono wara n̂etar̂as amna okwe.

4 Banteira tko mîmyakn̂e amna ya, apoko tweeno komo ya. Awosotî ke mewrexapu mîn bandeira. On wara mîîkekn̂e amna ya, On anîmcoko kahsî, Yaarono ponarono moxam ham, kachome enîn̂e komo ya, mîîkekn̂e.

5 Amna yukurunpeko awamorî ke kaari n̂ixan ke. Amna akronomakî, omtapotarî marha entakî. Yiixe awehtopo amna. Ero ke amna akronomakî esemetanmekîra tak amna yehtome.

6 On wara tak kesî Kaan kir̂wanî ro me cexirî ke, Kahwowasî tak ooxatî pîn komo yar̂macho poko. Siken wîraconkesî, wokpamesî tak. Sukoci woskaran marha wukuknomesî.

7 Orowonî rma mîn Xireaci ahnoro. Manases yepamtho rowon marha. Eprain yepamtho komo naxe oxapikan wara kuripara wara. Xuta yepamtho komo reha naxe oyamoyin wara, kayaritomo yamoyin wara.

8 Obasian warai mîkyam Moabe yepamtho komo, poono korokacho warai. Eton pono komo cheka ohtarî war̂mesî. Piristew komo yopono me oyexirî ke yahya wîîkesî tak, kesî. Ero wa kesî Kaan.

9 On wara wîîkesî yîwya hara, Onoke xa oyar̂a ewto imo pona twacayem pona? Onoke xa oyar̂a Eton pona?

10 Amoro rma na Apa iina ow maar̂a. Amna rma re ka mahsîpînkekn̂e okwe. Amna sowtatun komo yakro tohra ka mîxakn̂e okwe.

11 Amna tak akronomak hara esemetanmekîra n̂he tak amna yehtome. Tooto komo ya kakromomacho nasî kakronomacho pîn me rma okwe.

12 Kaan yakro kexirî ke so kîîxatî pîn komo yopo xa taxe okre. Noro xa kîîxatî pîn komo napikyasî. Ero wa kakronomexe so.