Waano Yaan̂e N̂enîrî On, Waihkano Cirihra Esko, Kacho. Tapi Wanorî On Miktan Warai. Tmaywen Komo N̂en̂epekn̂e Sau Tapi Mîn Yaka Noro Waihkachome Ero Yimaw Ciixapu On.

1 On wara wîîkes awya Apa, ooxatî pîn komo naxe yaake. Oyar̂ma xe ro mak naxe okwe. Ero ke ow cma re mukurunpesî.

2 Kicicme ciino rin̂e komo yai ro mak ow arko. Waihkano ri xatî komo ya marha Ow waihkapora esko.

3 Owapancexe okwe owaikachome, enko xe Apa. Karitî komo mîkyam. Tohnaw ro mak owaika xe naxe okwe kicicme oyehtoponho yanmera ro mak, kpanatanmetopo yanwecho yanmera marha okwe.

4 Kicicme exihra wîxakn̂e poko so. Wara rma kar̂pe cexe tuwuhre komo ka so, owotopo ka. Ero ke awomko tak Apa oyakronomachome. Enko xe oyar̂ma xe exirî komo.

5 Karitî ro xa Amoro Apa, ponaro Ixaw Yana komo yehtopo. Awomko tak mîk hak maywen komo panarechome awya ahnoro. Kicicme cehsom komo mîkyam, awanwekn̂e komo. Ero ke yîpînîn yawra so esko.

6 Kokmamyataw mokyaxe hara ewto pona. Xapari wara mak mayanaxe kica. Ewto mamhoko n̂etar̂axe.

7 Kicicme ro mak nîmtapowaxe kica. Kacipara imo wara nasî yîmtarî komo oko, entakî xe. Onoke ma re kencetu so? kexe kica.

8 N̂examro poko mewresî ro mak Apa. Noro pîntho ro mak amyamro, mîîkesî yîwya so. Ero wa mîîkesî mîk hak rowon pono komo ya.

9 Okariton̂e Amoro Apa. Owacan me cehsom marha Amoro, okurun me cehsom ha. Amohtopo ponaro wasî.

10 Ooxatî Mîk Kaan, ponaro oyehtopo. Oywapu cesî Noro. Tohnaw opoko tîmtapotaxmu komo panare xe tak wasî yîwya. Ero ke panarexapu komo tak n̂enpes owya.

11 Amna yecen̂an Amoro Apa. Ooxatî pîn komo waihkara esko. Waihkache awya n̂examro pen yehtoponho tak nîhcamnoyaxe opoyino komo. N̂examro pen akpakî mak kar̂pe awexirî ke. Anarî komo yopono mera marha n̂examro cirko.

12 Kicicme ro mak nîmtapowaxe n̂examro kica. Erem poko marha nîmtapowaxe, cemaronwaxe marha. Ero wa yîmtapotarî ke so n̂examro emcinoko ehcoyoponketaw so rma.

13 Ero ke n̂examro waihkakî kr̂a arwonîmrî me rma. Exihra cehso ro waihkakî. Ero wa n̂examro pen yîhcamnopuche awya awehtopo tak n̂ekaiporesî miyan komo ya rma roowo yenatîtopo pono komo ya meero. Kaan xa nasî Xako yepamtho komo kayaritomon me, kexe tak apoko.

14 On wara reha naxe noro yipu komo, kokmamrî me mokyaxe ewto pona. Tmayan̂em wara naxe xapari wara. Ewto mamrikyaxe.

15 Miya so cexe tînahrî yeposo. Kowunwaxe marha xapari wara.

16 Owî reha kewanomesî kar̂pe awehtopo poko. Pahxaxaro ka kewanomesî amna pînîn yaw awehtopo poko hara. Owacan warai Amoro. Ahyaka ketkurunpesî oyesenmekyataw roro.

17 Okariton̂e rma Amoro. Kir̂wan̂he awehtopo poko kewanomesî. Owacan warai Amoro, yahcono warai. Kaan xa Amoro ponaro oyehtopo, opînîn yaw cehsom xa. Noro yipu xa Amoro Apa. Ero wa wîîkes awya.