Waano Yaan̂e N̂enîrî On. Waihkano Cirihra Esko, Kacho Me Taasom On. Tapi Wanorî On Miktan Warai.

1 On wara wîîkes awya so en̂ekano rin̂e komo, yaaro ma re mîmtapowat ha? Yaaro ma re en̂ekano miir̂at ha?

2 Pîra ro mak. Aropotaw so kicicme ciino ritopo ponaro mak maxe. Emetanmekno ritopo poko mesehtînoyaxe kica. Awamorî ke so tak miyan komo rma memetanmekyaxe waihkano ritopo ke awya so. Ero wa miir̂axe roowo pono komo.

3 On wara naxe kicicme cehsom komo, cewrutoponhîrî komo n̂ixa ro rma anato n̂esehtînoyaxe. Tînocwan ropotainonho rma anarî me naxe, cemaronwaxe mak kica.

4 Iyokumuru komo nasî okoyi yokumuru wara. Okoyi warai xa mîkyam panahnî warai, cepanayahrusom warai.

5 Tpohkan̂e wanorî yentara thakwa nasî okoyi. Kir̂wan̂he aar̂ataw entara rma nasî. Noro warai xa marha amyamro.

6 Ero ke on wara noro yipu komo cirko Apa, etapakî tîyokaxi ro. Reaw warai mîkyam, kar̂pamxan warai. Noro yipu komo rma iyokakî Apa.

7 N̂ehcamnocowpe mak tuuna wara, pupyaka tîhtosom wara. Krapa yehsataw yîwya so potuhra cirko iyuhre komo.

8 Pooto wara rma n̂examro cirko. N̂ehcamnoyasî mak pooto tîcetaw rma. Ero ke noro wara rma cirko n̂examro. Rikomo wara xa marha cirko twaihso ewruxapu wara, kaamo yenîn̂e pîn wara rma. Ero wa n̂examro cirko.

9 Yohno rma wehto n̂etahsîyasî cekyekyem poko tahrem yeikacho poko. Anarimaw yaxanî rma n̂etahsîyasî, anarimaw waihxapu n̂etahsîyasî. Tahrem yocoronpera rma ka exitaw kicicme cehsom komo naar̂asî kr̂a Kporin komo. Ocowo warai ke n̂examro pen naar̂asî, cetapomrisom ke.

10 Nahwowaxe xa kir̂wan komo cepanpuche tak awya Apa. Tîhtarî komo tak korokexe kicicme cehsom komo kamxukutho kwaka.

11 Ero wa exitaw so on wara tak kexe waihkachonhîrî yentan̂e komo, Yaaro, kir̂wan̂he cehtoponhîrî yepetho nahsîyaxe ham kir̂wan komo. Roowo pono komo yen̂ekan̂e rma Mîk ham Kaan, kexe marha. Ero wa kexe kir̂wan komo yepanpuche awya Apa. Ero wa wîîkes awya Apa.