Waano Yaan̂e N̂enîrî On. Waihkara Esko, Kacho Me Taasom On. Tapi Wanorî On Miktan Warai Ha. Ewtarî Yaka N̂ewomyakn̂e Tapi Sau Ya Etahsîpora Cehtome. Ero Yimaw Mewrexapu On.

1 On wara wîîkes awya Apa, opînîn yaw cma re masî, opînîn yaw esko ha. Apona xa ween̂asî. Awaporî nasî kawarparen̂e me okre. Ero ke ero makataka rma kmokyasî okurunpetome awya. Iito wasî oyesemetanmetopo cenatîso ro.

2 Kaan yakro kîmtapowasî okurunpetopo poko, Kyopono Ro yakro. Ahce na poko oyexitaw ero ciin̂e me nasî Noro.

3 Kah yai rma n̂en̂epesî ancu, okurunpen̂e. Noro rma oyemetanmekî xatî komo n̂eeyasî. Ero wa ooxe cehtopo n̂enpesî, kemîknon̂e pîn me cehtopo marha.

4 Reaw chewno wara mak was okwe. Tmayan̂em chewno wara mak ketîrapesî. Tooto komo rma mîkyam reaw warai komo. Rah poturu mak mîn iyorî komo oko, waiwî rma ha. Kacipara imo marha mîn yun̂uru kom hara oko.

5 Ero ke kyopono ro me xa esenpoko Apa. Kaapu yepoyino me esenpoko. Roowo yepoyino me marha esenpoko kir̂wan̂he xa awehtopo yenpotome miyan komo ya rma.

6 Mîîye warai n̂iir̂atken̂e ooxatî pîn komo oyemcinotopo tî re. Katuhke mak wîxakn̂e oyahwokarî ke okwe. Ewtarî nahcetken̂e oyesamaw. Ero yaka rma tko n̂epîrketken̂e ahton̂enhîrî komo rma okwe.

7 Etaknaman me nas oropotarî Apa, etaknaman me ro mak ha. Ero ke kahwowasî apoko waano ke rma.

8 Apakakî tak ha, wîîkesî oropotarî ya. Raatî ya marha wîîkesî, sawter̂u ya, ahpa ya marha. Apakacoko wîîkesî yîwya so. Enmaporo rma kpakesî waano yaatome.

9 Apoko kahwowas Apa anarî yana komo n̂entarî me. Mîk hak rowon pono komo n̂entarî me waano waar̂asî apokono.

10 Amna xatî ro xa Amoro. Kah yaka rorono wara nas amna xe awehtopo. Ero wa xa marha nasî yaaro xa tîmtapotaxmu me awehtopo hara, kaapu smun yaka rorono wara nasî.

11 Kyopono ro me xa esenpoko Apa, kaapu yepoyino me esenpoko. Roowo yepoyino me marha esenpoko kir̂wan̂he xa awehtopo yenpotome miyan komo ya rma. Ero wa esko Apa.