Waano Yaan̂e N̂enîrî On Potkuku Pokono, Meyeno Pono Kapar̂u Pono Pokono Ha. Tapi Wanorî On, Miktan Me Taasom. Kaasa Po Exitaw Tapi Noro Nahsîyatken̂e Piristew Komo Ero Yimaw Ciixapu On.

1 On wara cma re wîîkes awya Apa, opînîn yaw cma re masî. Oyemetanmekyaxe mak ooxatî pîn komo okwe cerewre ro mak. Kaamo poko oyemetanmekyaxe.

2 Kaamo poko oyar̂ma xe naxe okwe. Mer̂pora naxe oyar̂ma xatî komo. Cehcoyoponkaxmu komo mîkyam kica.

3-4 On wara tko was ow Apa, oyeraswataw apona mak ween̂asî. Amtapotarî poko kahwowasî. Kaan pona ween̂asî. Ero ke erasîra wasî tooto komo pona. Ahce wa ma re oriyatu tooto komo? wîîkesî mak.

5 Wara rma kaamo poko omtapotachonho naknamexe kicicitho me hara okwe. Oyemetanmetopo ponaro mak naxe okwe.

6 Owapancexe ahna na owcetaw. Esama yawxaw owapancexe owaikachome okwe.

7 Ero wa naxe anarî maywen komo. Ero ke n̂examro poko tak arwonîmko Apa. Ar̂makî tak, esakan me ro mak n̂examro cirko.

8 Otacitoponho yukuknomatîkakî akaritan yaka. Oyewyokutho marha momohko een yaka, patere yaka. Tmewreso rma tko nasî oyewyokutho kuknomacho akaritan yaw.

9 Awakro kîmtapowas amn̂e oyakronomacho poko. Ero yimaw ooxatî pîn komo porohyaxe oyemetanmekîra rma. Ero wa oyakronomarî ke awya ooxatî me xa tak kîhtînoyas Apa.

10 Kaan pona ween̂asî, yîmtapotarî poko kahwowasî. Kporin komo pona ween̂asî, yîmtapotarî poko kahwowasî.

11 Kaan pona xa ween̂asî. Erasîra wasî tooto komo pona. Ahce wa ma re oriyatu tooto komo?

12 Oyokutho pun men wîmyasî roro awya, wîîkekn̂e awya pahxa Apa. Yaaro xa wîîkekn̂e. Ero wa omtapotachonho ponaro rma wasî. Ero ke, Aaxe xa wasî, kacho wakn̂iyasî awya tîmsom.

13 Waipîn me tko ow miir̂akn̂e. Ohtarî marha miir̂akn̂e ehrokan me. Ero wa ow miir̂akn̂e Kaan yanme mak oyehtome roro, weeyu po oyetaritome, waipîra kehtopo po ha. Ero wa ow miir̂akn̂e Apa.