Waano Yaan̂e N̂enîrî On, Tawyockem Yakro Taasom. Tapi Yesehtînotopo On.

1 Apa kah yawno, kîmtapowas awakro. Ero ke omtapotarî cma re mencesî. Kehsamesî apoko. Entan̂e pîn wara exihra cma re masî.

2 Ow ka entakî, ow marha eyuhko. Expora was Apa. Keserepokesî ro mak okwe.

3 Ooxatî pîn komo mtapotarî poko ahwora wasî. Oyemetanmekyaxe okwe. Owîrîmexe ro mak. Tîrwon me so ooxera ro mak naxe kica.

4 Ero ke ahwora ro mak was okwe. Keraswasî ro mak owaitopo pona.

5 Keraswasî ro mak okwe. Kîtatanas okwe. Keserepoketîkesî oyopo ro mak okwe.

6 Ero ke on wara wîîkekn̂e oropotaw, Potkuku yaporî xe was okre. Ero warai ke tapoke oyexitaw ketaw ha re miya kîwtorî ha re kaikokoro. Oyepokarecho pona kîwtorî ha re okre.

7 Miya ro makî re kîwtorî. Iito tak re wexirî pohnîntaw.

8 Kar̂pe ro makî re kîwtorî iina. Iito takî re wexirî mooxe ocowo imo n̂ewrucperî mera.

9 Oyar̂ma xatî komo cirko cesewkukmaxmu me Apa. Anarmerpa tîmtapotaxmu me cirko. Ewto pono komo n̂esetapexe oko owero ro, etpoko naxe okwe.

10 Ewto wacan kanahtaw n̂etapomrikyaxe ehtura. Katpanaw cexe, kosope marha. Kicicme naxe etpoko ewto pono komo, emetanmekno n̂iir̂axe okwe.

11 Waihkano rirî poko naxe okwe ewto pono komo. Cemaronwaxe roro, emîknono marha n̂iir̂axe roro ero po esama yaw so.

12 Ooxatî pîn mak yîmtapowataw ketaw ha re opoko, kicicme yîmtapowataw so opoko, wînîmrî ha re. Ooxatî pîn komo mak mîkyam oyar̂ma xe exitaw so ketaw ha re keseyamrî ha re n̂examro n̂enîhtorî rma, wîîkesî. Ero wa wîîkes awya Apa.

13 Taa, oyakrononho yakro tak kîmtapowas hara. On wara wîikesi yîwya, Amoro xa matko ero wa mas opoko okwe okîrîyemî rma. Oyakro tîmtapotaxmunhîrî rma.

14 Pahxa ka tahwore cesencetken̂e. Iito re tîhcetken̂e mer̂pono pîn komo yakro Kaan mîn yaka. Noro yipunhîrî tak ow mîwîrîyakes hara okwe.

15 On wara wîîkesî noro yipu komo poko, Ooxatî pîn komo waihcowpe. Kar̂pe rma tocowpe ewtarî imo yaka. Kicicitho poko naxe tîmîn komo yaw.

16 Kaan yakro tko kîmtapowasî owî reha oyakronomacho poko. Noro rma oyakronomesî.

17 Kokmamrî me kîmtapowasî Noro yakro, pahxaxaro marha, kamarakataw marha. Kar̂pe kîmtapowasî Noro yakro. Omtapotarî xa n̂encesî.

18 Mer̂pora ro mak naxe oyar̂ma xatî kom okwe. Oyar̂mapora tko nasî Noro yîwya so. Ahwokara rma oyar̂asî.

19 Kayaritomo xa Mîkro Kaan pahxanînhîrî rma. Noro rma n̂encesî opoko yîmtapotarî komo. N̂examro tak n̂emetanmekyasî. On wara kyam wai ham, kexe mak. Ero ke Kaan poko twerîhra naxe.

20 On wara nasî noro ooxatî pîn, noro poko tawake xatken̂e anarî komo. Noro yipu komo n̂emetanmekyasî mak okwe. Tîmtapotachonhîrî yaw roro exihra tak nas okwe, Cetakronomaxmu me cexirî, kachonho ponarora.

21 Tmemehse xakn̂e yîmtapotarî katî wara, puruma tawaretopo wara. Kwaihkacho komo ponaro tko xakn̂e tîropotaw okwe. Katî wara rma cma re xakn̂e yîmtapotarî kir̂wan̂he okre. Kacipara imo wara rma tko xakn̂e hara yîmtapotarî oko, een yai mohkaxapu wara. Ero wa xakn̂e ooxatî pîn.

22 On wara tko wîîkesî, Kporin komo pona xa enko tawsîn̂em yaan̂e warai me awexitaw. Kir̂wan komo yecehton̂e Mîk, ahwokatîkara kiin̂e ha.

23 On wara tko mas Amoro Apa, kicicme cehsom komo mar̂mesî ewtarî yaka waihkachome so. Ero ke waihyaxe mak tak waihkano ri xatînhîrî pen komo, cesemîknosom pen komo marha. Yohno rma waihyaxe kar̂pamxan me rma okwe. Owî reha apona mak ween̂asî. Ero wa was ow.