Waano Yaan̂e N̂enîrî On, Tapi Yesehtînotopo. Maarace Me Taasom On.

1 On wara kexe akpîra cehsom komo, Exihra ro mak nasî Kaan, kexe. Kicicme ro mak naxe ero wa kan̂e komo okwe. Kcicme ro mak naxe ahce na poko cexitaw so. Miyan komo rma naxe ero wa okwe. Kir̂wan̂he cehsom exihra ro mak nas okwe.

2 Kah yawno Mîkî Kaan, en̂exa rma keen̂axe so, miyan komo rma n̂een̂asî. Yuhnari yîhtînon̂e tî n̂epor̂a, Kaanî yenî xatî.

3 Yiixera ro makî tko naxe, anato nîhtînoyaxe okwe ahnoro. Kicicme tak n̂ehtîketken̂e kica etîme re. Kir̂wan exihra ro mak nasî tooto, cewn̂e n̂hema exihra nas okwe.

4 Camkî ma natu kicicme ciino rin̂e komo? Oyanan komo yonon̂e wara naxe, turu komo nokyaxe ero wa oyanan komo yermomn̂e wara naxe okwe. Ow akronomak Apa, kahra ro mak naxe Kaan ya.

5 On wara xatken̂e noro yipu komo, n̂eraswatken̂e tak erahtîmtopo komo exihra rma exitaw so kopi. Kaanî rma ero wa n̂iir̂akn̂e. Iyochîrî komo nakpayakn̂e Noro, awaparî me mohxapunhîrî komo yocho. N̂examro yopo mîxatken̂e, kar̂pera xatken̂e n̂examro yiixera ro mak Kaan yehtopo me exirî ke so.

6 Ixaw Yana komo kurunpen̂e moku xe ro mak wasî, Siaw po nasî Noro. Noro mokyataw amn̂e tîyanan komo tak n̂iir̂asî ehn̂an me hara. Ero yimaw Xako yepamtho komo tak nahwowaxe, Ixaw Yana komo naxe tawake. Ero wa naxe okre.