Waano Yaan̂e N̂enîrî On, Tapi Ya Kpanatanmetopo. Toeke Tî Cekn̂e Sau Yaka. Eton Pono Mîk Ha. On Wara Tî Kekn̂e Yîwya, Aimereke Yaka Cekn̂e Tapi, Kekn̂e. Ero Pokono On.

1 On wara wîîkesî tooto ya, karitî ya, Ahce kacho kicicme awehtopo poko mehcoyoponke? Kwakren̂e komo me rma re wa nasî Kaan miya roro.

2 Waihkano ritopo poko mîmtapowasî kica. Iyohtoxapu wara nasî an̂uru kun̂imixi wara. Cemaro poko nîmtapowasî kica.

3 Kicicitho xatî mak amoro, kir̂wan xatî pîn. Cemaro xatî marha amoro, kir̂wanhe amtapota xatî pîn.

4 Kîwîrîmacho poko amtapota xatî xa amoro. Cemarontaxmu mak mîn an̂uru.

5 Amoro pen xa marha awîrîmesî ro mak Kaan eroromero. Awahsîyasî, amohkesî amîn yai. Peen tîtmokesî yimicin meero ero wa xa marha amohkan̂e wara nasî Kaan waipîn komo chei.

6 Ero wa awitopo n̂een̂axe amn̂e kir̂wan komo. Ero ke Kporin komo poko twerî tak naxe. Apoko n̂ewrexe marha.

7 On wara kexe apoko, Enko tî mîk pen okwe. Kaan ya ekaritopora ro mak xakn̂e ham okwe. Cemyawno pona mak n̂een̂akn̂e mer̂pono pîn pona. Waihkano rirî poko mak n̂ekaricekn̂e okwe, kexe tak apoko.

8 Owî reha wasî oripa yepu wara. Taakem wara wasî Kaan mîn yawno wara. Kîpînîn yaw Kaan yehtopo ponaro mak wasî miya roro.

9 Miya roro kîmtapowas Apa, yaarono me awehtopo poko. Yaaro awya en̂ekano ritoponho poko kîmtapowasî. Anakir̂wamathîrî komo n̂entarî me rma kîmtapowasî kir̂wan̂he awehtopo poko. Awosotî pona marha ween̂asî. Kir̂wan mîn awosotî. Ero ke ero poko kîmtapowasî.