Waano Yaan̂e N̂enîrî On, Tapi Wanorî. Tapi Yaka Tî Mokyakn̂e Natan Baceseba Poko Exiche. Kweronoman̂e Mîk Xakn̂e Natan. Ero Yimaw Mewrexapu On.

1 On wara wîîkes awya Apa, opînîn yaw cma re masî. Kwakren̂e ro xa Amoro, kîpînîn yawno ro marha. Ero ke kicicme oyehtoponho cma re mîhcamnoyasî.

2 Kicicme oyehtoponho towko ahnoro. Ow korokakî kicicme ehxapunhîrî.

3 Awewetîra oyehtoponho tak wekatîmyasî. Kicicme oyehtoponho ponaro ro was okwe.

4 Apoko xa kicicme wîxakn̂e kica. Kicicme meen̂as oyehtoponho. Ero ke kesekatîmyas awya, Yaaro xa nîmtapowasî, kachome tak miyan komo ya rma apoko. Yaarono mera en̂ekano n̂iir̂a ham kica Kaan, kahra marha ehtome so apoko ero wa wîîkes awya.

5 Kicicitho ow ha meexaro oyewrutoponho n̂ixa ro. Kicicme wîxakn̂e onocwan ropotaw rma, oyetahsîtoponhîrî n̂ixa ro rma.

6 On wara amna exi xe mai, yaaro tîmtapotaxmu me amna exi xe mai ham tîropotaw. Oropotaw rma ow makîhre ham okre.

7 Iisopu ke ow akir̂wamakî kir̂wan̂he tak oyehtome hara. Ow korokakî tumutwe xa tak oyehtome n̂eepi yopo ro mak.

8 Oyahworetopo tak ekatîmko owya, otawakerecho marha. Ero warai ekatîmko owya tahwore tak ehtome oyocho anaxikwothîrî ha.

9 Kicicme oyehtoponho yenîn̂e pîn wara esko Apa. Kir̂wn̂he exihra ro mak oyehtoponho yickak ahnoro.

10 Kir̂wan me tak oropotarî cirko hara Apa. Emacakan me ro mak tak oyekatî cirko.

11 Miya ow en̂epera marha esko. Awekatî marha towhra esko oropotai, Kir̂wanî ro Yekat ha.

12 Kakir̂waman̂e xa Mîk ham Kaan okre, kan̂e me xa hara ow cirko. Oyekatî tak cirko awewetî xatî me.

13 Ero wa oyexiche tak awanwekn̂enhîrî komo tak panatanmekyas ow awehtopo poko. Ero yimaw apona enîn̂e me tak natu kicicme ehxapunhîrî komo.

14 Waihkano rin̂enho me oyehtoponho yîhcamnoko Apa. Oyakir̂waman̂e xa Amoro Apa. Ero wa oyakir̂wamache tak awya, kewanomesî kar̂pe kir̂wanî ro me awehtopo poko.

15 Omtarî ahrunkak Apa. Ero yimaw tak kir̂wan̂he xa awehtopo wekatîmyasî.

16 Oyokutho pun yakn̂iyataw owya awya tîmsom me yiixera mai. Ero yipu poko mak tawake awexitaw ketaw ha re wîmrî ha re awya. Oyokutho pun yakn̂itopo poko mak tawake exihra masî, takn̂itîkaxmu me akn̂itopo poko meero. Ero yipu poko tawake exihra masî.

17 Kicicme kehtoponhîrî poko kahwokatîkacho xa yo nasî Kaan ya tîmsom mexan me. Kicicme cehtoponho poko amna yahwoketaw amna yîwîrîyakara ro mak mas Apa.

18 Yiixe awexitaw tak Siaw pono komo wakreko Apa. Xerusaren wacan tak cirko hara.

19 Ero yimaw tak kir̂wan komo nakn̂iyaxe tokuthîrî komo pun awya tîmsom me. Takn̂itîkaxmu marha nîmyaxe awya. Tokuthîrî komo pun nîmtîkexe awya tîmsom yakn̂itopo pona. Ero yimaw tawake tak masî yînîmrî komo poko. Ero wa masî.