Asape Wanorî On.

1 On wara wîîkes awya so, Kporin komo tak nîmtapowasî kakro so. Kaan Mîk nîmtapowasî, Karitî Ro. Roowo pono komo nan̂ikyasî miyan komo rma, kaamo yepatakacho n̂ixan komo, kaamo yemicitopo n̂ixan komo marha ahnoro mak.

2 Siaw po nasî Kaan, cenporem po xa. En̂exa rma katpareno n̂iir̂asî.

3 Mokyasî xa tak men Kaan, ponaro kehtopo. Tîtken̂e exihra tak nasî. Wehto n̂etahsîyasî Noro poturme. Noro mamhoko nocowonasî kar̂pe ro makî.

4 Kah yawno komo nan̂ikyasî Kaan, kepoyino yawno kom ha. Roowo pono komo marha nan̂ikyasî. Tîyanan komo yen̂ekachome nan̂ikyasî.

5 On wara kesî tanton komo ya, Ai, oyanan komo enmecoko oona ohyaka. Awewetîn̂e me nas amna, kan̂enho komo owya. Tokuthîrî komo pun yakn̂irî me ero wa ketken̂e owya, noro yipu komo enmecoko ohyaka, kesî Kaan yîwya so.

6 Kir̂wanî ro me Noro yehtopo n̂ekatîmyaxe kah yawno komo. Noro rma nasî en̂ekano rin̂e me.

7 On wara kesî Noro, Omtapotarî ka entacoko amyamro oyanan komo. Ixaw Yana kom ha. On wara wîîkes awya so, kicicme awehtopo komo tak wekatîmyas awya so. Kaan xa Ow ha, ponaro awehtopo komo.

8 Ahce na rma re mîmyaxe owya. Awokuthîrî komo pun marha makn̂iyaxe yîmton me. Emapona roro makn̂iyaxe. Ero wa awehtopo komo poyero aweira so wasî.

9 On wara tko wîîkesî, Awok mîn yawnonho komo mîmyaxe owya bui ha. Boce marha mîmyaxe owya awok wacan yawnonho.

10 Ahnoro comota chewno komo nasî oyok me. Paaka komo marha nasî oyok me, îh pono komo, 1.000 pono komo rma.

11 Ahnoro tarin̂em komo yenîn̂e xa Ow, îh pono kom ha. Woskara pore cetarisom komo yosom me marha wasî, okno pîn komo yosom me ha.

12 Oromanataw ketaw ha re, Oyotî n̂he eeko, kahra was awya. Roowo ahnoro nasî orowon me. Yiipono marha nasî owyan me ahnoro.

13 Paaka pun ma re woon̂e awya so? Boce kamxukutho ma re weer̂a awya so?

14 On wara xa matko ehcoko, Kir̂wan̂he amna mîwakrei ham okre, kacoko xa matko owya. Amtapotachonhîrî komo yaw roro marha ehcoko, Ero wa men was amn̂e Apa, mîîkai na Kaan ya Kyopono ro ya ha, ero wa kachonho yaw roro marha ehcoko ha.

15 Ero wa awexitaw so oyakro tak amtapotacoko awesemetanmekyataw so, Ero yimaw tak kakronomexe so. Ero ke, Kaan xa oyakronomai, mîîkexe opoko, kesî. Ero wa kesî Kaan tîyanan komo ya.

16 On wara marha kesî Kaan kicicme cehsom komo ya hara, Ahce kacho omtapotarî mukukmetu apanatanmetopo kom ha? Ahce kacho, Kakronomexe so Kaan amn̂e, kachonho poko mîmtapowatu amyamro reha omtapotachonho poko ha?

17 Poxumra ro makî tko mencexe omtapotarî, apanatanmetopo kom ha. Omtapotarî yar̂man̂e wara mak maxe okwe, amkai so ar̂man̂e wara.

18 Cen̂epan̂em yeen̂ataw awya so makronomexe mak kica. Cipici yai ro cehsom komo yakronoman̂e me marha maxe kica.

19 Kicicitho poko tîmtapotaxmu me mak amtarî komo miir̂axe kica. An̂uru komo marha miir̂axe cesemîknosom me mak kica.

20 Awakno komo poko mîmtapowaxe kicicme so kica, anocwan komo mrerî poko rma. Kicicme n̂eexi noro, mîîkexe tohnaw ro mak.

21 Ero wa maxe kica. Tîtken̂e makî ka wîxakn̂e aweira so. Kwara so xa marha nai Kaan ham, mîîketken̂e ham kica. Keiyaxe so rma tko wa ha amn̂e. On wara, on wara, mîxakn̂e kica, wîîkesî tak. Tatke wekatîmyasî awehtoponhîrî komo awya ro so rma.

22 Ero ke on wara wîîkesî Kaan poko twen̂ekano komo ya, On wara kacho men entacoko, Noro ponarora awexitaw so kwaihkexe so tak men okwe. Karixkexe so ro mak oko. Akurunpen̂e komo exihra ro mak men nas okwe ero yimaw.

23 On wara men entacoko, Kir̂wanî ro Amoro Apa okre, kacho xa yo tîmpore nas owya. Ero yipu tîmn̂e me awexitaw so kir̂wan̂he oyehtopo yenpon̂e me maxe. Kir̂wan̂he awexitaw roro so marha Kaan ya awakir̂wamacho komo poko tak kîhcamhokexe so. Ero wa wasî apoko so, kesî Kaan awya so.