49
Waano Yaan̂e N̂enîrî On, Kore Mumuru Komo Wanorî Akpîra Cesehtînosom Me Naxe Tupurantan Komo Pona Enîn̂e Komo
1 On wara wîîkes anarî yana komo ya, roowo poko hakno komo ya, entacoko ka omtapotarî, wîîkesî.
2 Maywe me cehsom komo ya wîîkesî, antomano rin̂e komo ya marha, cemyawnoyam komo ya wîîkesî, emyawnomnî komo ya marha, omtapotarî ka entacoko amyamro ahnoro.
3 Takîhso kehtopo poko tan kîmtapowasî. Oropotawno rma tan wekatîmyas awya so yuhnari yîhtînomexpotopo.
4 Poritomo penî mtapotachonho wencesî, kakîhretopo komo. Camkînonhîrî wekatîmyas awya so waano me. Raatî yakro kewanomesî.
5 Anarimaw oyesemetanmetopo me na n̂enmaya emapona. Kicicitho komo owamcetu, cesemîknosom komo kica. Ero wara oyexitaw ahce kacho ma re keraswa?
6 Tupurantan komo pona mak n̂een̂axe anarî komo. Cemyawnoi xa cehtopo poko n̂ehcoyoponkexe.
7 Noro yipu komo rma tko takno komo yepemara thakwa naxe waipînî ro me tak ehtome so. Kaan ya tîmîhra thakwa naxe epethîrî, waipînî ro me ehtopo komo yepetho.
8 Cepethîke xa thakwa nasî waipîn me kehtopo. Atî wicakî na epethîrî exitaw kîhyaw so ero yecenarîra rma thakwa nasî.
9 Ero ke waipîn me kakno komo yehtopo yepetho tîmîhra thakwa taxe, matahnî me ro mak ehtopo komo yepetho ha.
10 On wara naxe anarî komo, takîhso cehsom komo waihîrî rma n̂een̂axe, akpîra cehsom komo waihîrî marha wa n̂een̂axe, wara mak cesehtînosom komo waihîrî ha. Waipuche so cemyawnonhîrî tak nînomyaxe anarî komo yemyawno me hara. Ero wa anarî komo waihtopo rma re n̂een̂axe.
11 On wara tko kexe noro yipu komo tîropotaw so, Eroromerono mîn okre omîn. Miya roro ehretawnomaxapu komo mîn me rma nas amn̂e omîntho, kexe. Ceken komo marha nosohcexe tosotî me so rma.
12 Miya rorono pîn me tko taxe, tooto kom ha. Takîhsom me cekaiporesom komo rma eroromerono me exihra naxe. Okno wara kyam mak naxe tooto komo ahnoro twaihsom me.
13 Ero wa naxe akpîra cehsom komo. N̂examro wa xa marha naxe yîhretawno kom hara, yîmtapotachonhîrî komo ponarono kom ha.
14 Kahn̂eru wara rma thakwa naxe roowo cheka tahrusom me. Kwaihtopo yotî me mak naxe okwe. Enmapuche tak kir̂wan komo naxe n̂examro yantoman̂e me hara. Cenpore xa n̂examro pen yehtoponho tak macesî roowo chew. Mooxe rma macexe ekenhîrî komo pohra ro mak.
15 Owî reha oyanîmyasî Kaan amn̂e roowo chewnonho. Oyahsîyasî tak tîyanan me.
16 Ero ke eserepokatîkara ehcoko cemyawnoi ehtîketaw anarî komo. Cenporem xa na n̂iir̂atu tîmîn komo.
17 Twaihyataw so tko cemyawnonhîrî komo yarîhra ro mak wa naxe Cenporem me exihra tak naxe roowo cheka tîtoche so.
18 Waipîra rma ka cexitaw so, Takîhsom xa ow ham okre, kexe tîropotaw so. Ero wa xa marha kexe miyan komo rma cemyawnoyem komo poko, Takîhsom mîkyam ham okre, kexe poko so.
19 Tporin pen komo yaka makî tko cexe. Katpan yenîn̂e pîn me ro mak tak naxe okwe.
20 Okno wara kyam mak naxe kyopono me cesekaiporesom komo rma. Yuhnari yîhtînon̂e pîn me exitaw so ero wara naxe. Waihyaxe thakwa okwe okno wara rma. Ero wa naxe okwe.