Kore Mumuru Komo Wanorî On

1 Kyopono ro xa Mîk Kporin komo. Ero ke kir̂wan̂he Noro yehtopo poko tîmtapotapore nasî. Tahwore xa kapore nasî ponaro kehtopo yewton po. Ero wa tîmtapotapore nasî, Noro yekenî ro po îh po.

2 Cenporem xa mîn okre Siaw Yîpîn, kawno okre. Roowo poko hakno komo yeserepokacho xa mîn ha. Nohce yaw roro nasî. Kayaritomo yewton mîn, Kyopono ro yewton ha.

3 Iito nasî kayaritomo mînî mko. Ero yawno komo Kaan nîhtînoyaxe tukurunpen̂e komo me.

4 Kayaritomo komo rma re n̂esenmekyatken̂e. Cow wara cetken̂e.

5 Ewto yenîche tak n̂eserepoketken̂e, nahwoketken̂e xa. Ero ke tak n̂emahciyatken̂e ro makî.

6 Tatanatken̂e tak iito cerahtîke so. N̂erewatken̂e ro mak tak ha tî wooxam wara cewrusom wara.

7 Ero yimaw tak n̂examro pen mar̂mekn̂e exihra cehso ro. Tahsisi pono pen komo kanawarî wakrokesî ocowo, kaamo yepatakacho n̂ixan, ero wa n̂examro pen mar̂mekn̂e. Ero wa ar̂mano miir̂akn̂e Apa.

8 Kir̂wanî ro mîn Kaan yewton, kacho amna n̂encekn̂e. Oroto tak amna n̂een̂asî. Yaaro xa ketken̂e amna ya. Kporin komo yewton xa mîn ham, kantoman̂e ro yewton, ponaro kehtopo komo yewton ha. Ar̂man me ro mak Kaan n̂iir̂asî.

9 Ero po nas amîn Apa. Ero yaw amna exitaw, twakren̂e me awehtopo poko amna n̂esehtînoyasî.

10 Apa, awosotî n̂encexe roowo poko hakno komo. Ero wicakno komo marha n̂encexe kir̂wan̂he awehtopo. Kir̂wan̂he ciino ritopo nasî awamorî yaw, kaari n̂ixan yaw.

11 Tawake n̂ehcowpe Siaw Yîpîn pono komo. Tawake marha n̂ehcowpe Xuta yemsîrî komo ahnoro. Ero wa n̂ehcowpe awya panareno rirî ke.

12 Siaw mamhoko etapomricoko. Yaake nasî mîîmo iito, kawno komo. Yukuknomacoko xe ka.

13 Ero ewto wacan komo marha encoko takîhso, sowtatu yecen̂an kom ha. Mîîmo komo marha encoko iitono komo, sowtatu komo mîn. Ero wa encoko ekatîmtome tak amn̂e amxîkrî komo ya.

14 Ponaro kehtopo xa Mîk Kaan. Eroromero Noro ponaro taxe. Kaan̂e me nasî Noro miya roro, kwaihtopo komo pona roro. Ero wa nasî.