Waano Yaan̂e N̂enîrî On, Kore Mumuru Komo Wanorî

1 On wara wîîkes awya so anarî yana komo, knowknow kacoko, On wara kacoko Kporin komo ya, Tahwore ro mak nas amna apoko Apa okre, kacoko yîwya. Kar̂pe ro mak kacoko, emtarakacoko xa ero wa ketaw.

2 Yukurumîkno xa Mîk Kporin komo, Kyopono Ro xa. Roowo poko hakno komo kayaritomon xa Mîkî, miya ro mak cekaiporesom ha.

3 Anarî yana pen komo nar̂mapes amna ya. Mîk hak rowon pono pen komo n̂iir̂asî amna napikrî me.

4 Noro rma keken komo men̂ekekn̂e. Xako yeken mexan xa men̂ekekn̂e, yiixe cehtopo yeken me ha.

5 Ero ke on wara wîîkes awya so, Kaan cekn̂e ceken pona îh pona. Akrono komo nahwowatken̂e. Okre, okre ketken̂e kar̂pe ro mak tîcetaw so. Tuu ketken̂e marha, raatî n̂eceyatken̂e okre.

6 Amyamro marha kir̂wan̂he Kaan yehtopo poko ewanomacoko, ewanomacoko xa tak. Kir̂wan̂he kîkayaritomon komo yehtopo poko ewanomacoko. Ewanomacoko ro mak.

7 Roowo poko hakno komo kayaritomon xa Mîk Kaan. Awero ro so xa ewanomacoko kir̂wan̂he Noro yehtopo poko.

8 Mîk hak maywen komo kayaritomon me nasî Kaan. Ceremaxi nasî Noro taponî ro po, kayaritomo me cesenpotopo po ha.

9 Kaan yeken pona n̂esenmekyaxe antomano rin̂e komo, ponaro Abraaw yehtopo yanan kom ha. Kaan yemtawno ro me nasî roowo poko hakno komo yecen̂anmacho ha. Kayaritomo me xa tak n̂esenpesî Noro, kyopono ro me xa tak ha. Ero wa n̂esenpesî.