Waano Yaan̂e N̂enîrî On, Kore Mumuru Komo Wanorî, Aramotu Me Taasom Ha.

1 On warai xa Mîk Kaan, Kwacan warai Mîk ha, kecen̂an warai, kîkariton̂e marha Mîk ha. Kesemetanmekyataw so kakro so rma nasî kakronomachome so.

2 Ero ke erasîra ro mak taxe roowo pen yehcamnoyataw rma kaponhîrî pen komo. Anarimaw îîpî pen komo n̂emokocetu tuuna imo rakataka.

3 Tuuna imo marha na n̂ewtuna, n̂esewcokocokomesî marha. N̂esewsîya na îîpî pen komo tuuna yekahximarî ke. Ero wa exitaw erasîra rma taxe.

4 Taa, anarî nai hara tuuna yepu. Ero nîhcesî Kaan yewton pore, Kyopono Ro yekenî ro pore. Iitono komo yahworetopo mîn tuuna yepu.

5 Iito nasî Kaan iitono komo chew. N̂examro yar̂mapora ro mak nasî Noro waapa ya. Enmayataw tak n̂examro nakronomesî Kaan.

6 On wara xatken̂e mîk hak rowon pono komo, n̂etîrwonmekyatken̂e ro mak okwe. Waihyatken̂e kayaritomon pen komo. Kaan tak nîmtapotai. Yîmtapotarî yanme tak nuxukrapamye roowo pen.

7 Kakro so rma tko nasî Kporin komo kantoman̂e ro. Ponaro Xako yehtopo Mîkî. Kwacan me nasî Noro kecen̂an me ha.

8 Amohcoko Kporin komo nîwîrîmatho yenso. Nîwîrîmekn̂e ro mak roowo pono pen komo okwe.

9 Anarimaw so cetar̂maxmu komo nîtîtmamnoyasî hara Noro roowo mapitawno komo meero marha. Yîkrapanthîrî komo marha naxikwesî. Yîrahnuthîrî komo marha natukmesî. Tararanthîrî komo marha nakn̂iyasî. Ero wa cetar̂maxmunhîrî komo n̂iir̂asî Kporin komo.

10 On wara tko kesî Noro kîwya so hara, Tîtken̂e mak ehcoko Kaan me xa oyehtopo yîhtînotome tak awya so. Kayaritomo ro me tak oyen̂axe amn̂e mîk hak rowon pono komo. Karitî me xa tak oyen̂axe roowo pono komo ahnoro.

11 Kakro so nasî Kporin komo, kantoman̂e ro. Ponaro Xako yehtopo Mîk ha. Kwacan warai me nasî Noro, kecen̂an me ha. Ero wa nasî.