Waano Yaan̂e Komo N̂enîrî On. Epemrutun Pokono Wara Rma Taasom. Kore Mumuru Komo Wanorî On, Maskiw Me Taasom, Kipitacho Yimaw Taasom Ha.

1 On wara wasî, poko oyeserepokacho yekatîm xe xa wasî. Kayaritomo yehtopo poko keserepokes ha. Ero ke Noro poko kîmtapowasî. Karita mewretopo wara rma nas on̂uru, takîhso mewren̂e yemyawno wara.

2 Ero ke on wara kacho mewrepo xe wasî yîwya, Cenporem xa Amoro Apa, tooto komo yopo ro mak. Kir̂wanî ro me cehtopo Kaan n̂iir̂akn̂e amtaka. Ero wara awexirî ke eroromerono ke awakrekn̂e Kaan.

3 Karitî Amoro, akaciparan tak enkakî awan̂apotun pokono yaka. Kayaritomo ponon marha tak amruko kir̂wanî ro xa.

4 Ero yinhîrî tak kayaritomo me xa etoko kawaru mkaw ehn̂an me ro mak. Yaaro tîmtapotaxmu komo yukurunpen̂e me etoko, ehcoyoponkanî ro komo kurunpen̂e me marha, kir̂wan komo kurunpen̂e me marha. Yukurumîkno komo yar̂man̂e me rma etoko. Awamorî ke ar̂mano cirko, kaari n̂ixan ke.

5 Tpotkem mîn awuhre kayaritomo xatî pîn komo coro wotopo. Anarî yana komo yar̂man̂e me masî.

6 Kaan xa Amoro, kayaritomo me masî miya roro etowîn me ro mak. Awamoyinî rma nasî kayaritomo me awehtopo kuknon me. Kir̂wanî ro me awehtopo kuknon me marha nasî.

7 Tpoxwe ro mak nas awya kir̂wan̂he kehtopo. Poxumra ro makî reha nas awya kicicme amna yehtopo. Ero ke ero wa awexirî ke Kaanî rma ahkapekn̂e awahworetopo ke. Awakrono komo rma re nîhkapekn̂e ero yipu ke. Amoro xa ahkapekn̂e xa n̂examro yopo.

8 Kotoporem okre aponon. Miiha me kotowasî, aroe me marha, kaxa me marha. Kayaritomo mîn yaw naxe raatî yorkan̂e komo. Mahpin ke ciixapu mîn yîmîn komo. Ero yawno komo awahworexe raatî yorkarî ke.

9 Kayaritomo yemsîrî komo naxe awakrono komo, takîhsom kom ha. Apanaw rma nas apici hara kaari n̂ixa. Kir̂wan mîn noro ponon okre, Oopi poi ehxapu mîn ooru.

10 Taa, on wara wîîkes awya hara oyemsîrî, omtapotarî men ka entakî. Ayanan komo ponarora tak esko, aamo yawno kom ha.

11 Ero wa awexitaw tak tîn̂enîrî mexe xa tak awen̂asî kayaritomo cenporem me awexirî ke. Noro ponaro xa esko an̂ewetîrî me exirî ke.

12 Amn̂e mokyaxe wooxam komo, Ciru pono yemsîrî komo. Awya tîmsom n̂ekyaxe. Ahyaka mokyaxe tupurantayem komo tponaro so awehtome hara.

13 On wara nasî kayaritomo yemsîrî, kir̂wan̂he ro mak nasî kayaritomo mîn yaw. Kir̂wan̂he xa nasî Noro ponon, ooru yakro ceske kahso nasî.

14 Tporokye nasî noro ponon okre. Ero yaw kayaritomo yaka naar̂axe. Wenari cexe akrono komo emasî kom ha. Ero wa n̂ewomyaxe ahyaka Apa.

15 Tahwore xa n̂ewomyaxe, nahwowaxe xa iina taatopo poko kayaritomo mîn yaka. Kayaritomo mînî ro yaka n̂ewomyaxe.

16 On wara marha wîîkesî kayaritomo yemsîrî ya, Amrerî komo tak naxe amn̂e ahyaw aamo komo yemtaka hara. N̂examro miir̂asî enîno rin̂e me xa, roowo poko hakno komo yenîn̂e me.

17 Awehtopo wekatîmyasî miya roro ehretawnomaxapu komo ya rma. Ero ke, Kir̂wan̂he mai ham okre, kexe tak apoyino komo apoko. Yîhtîhkan me ro mak ero wara kexe.