Waano Yaan̂e N̂enîrî On, Koore Mumuru Komo Wanorî Ha

1 On wara wîîkes awya Apa, amna n̂encekn̂e pahxa awya ciino ritoponho, Ero n̂ekatîmyatken̂e amna porin pen komo amna ya. Twero ro so ciino ritoponho awya n̂ekatîmyatken̂e amna ya.

2 Awamorî ke rma iitono maywen komo men̂epekn̂e ekenhîrî komo poi. Ekenhîrî komo pona tak amna porin pen komo mekenmekn̂e hara. Iitononhîrî pen komo reha memetanmekyakn̂e. Amna porin pen komo reha makronomekn̂e.

3 Tîkaciparan komo yanmera rma iitononhîrî pen komo yekenho nahsîyatken̂e. Tapokar̂pe cexirî komo yanmera marha iyopono me xatken̂e. Amoro xa mar̂mekn̂e awamorî ke kaari ke. Awaporî ke marha mekaricekn̂e ar̂machome awya. Tawake mîxakn̂e amna porin pen komo poko. Yiixe so mîxakn̂e okre. Ero ke iitononhîrî pen komo mar̂mapekn̂e yîwya so.

4 Ero ke on wara wîîkes awya Apa, Kaan xa Amoro. Aaxatî pîn komo yopono me ehcoko, kacoko Xako yepamtho komo poko.

5 Takronomarî ke mak awya tîîxatî pîn komo nar̂mes amna amn̂e. Awosotî ponan me amna napikyasî kr̂a tar̂ma xatînhîrî komo.

6 Okrapan pona enîhra wasî. Okaciparan ke mak owaparî komo yopono me exihra wasî.

7 Amoro xa amna miir̂akn̂e tîîxat pîn komo yopono me okre. Amoro xa amna waparî komo mehn̂anmekyakn̂e.

8 Kîkariton̂e xa Mîk Kaan okre, kes amna kaamo poko. Awosotî poko amna nahwowasî miya roro yîtîhkan me ro mak.

9 Amna tko mahsîpînkes okwe. Cehn̂axmu me amna miir̂as okwe. Amna sowtatun komo yakro tohra tak mas okwe.

10 Amna xatî pîn komo miir̂as amna weken̂emekn̂e me okwe. Amna yemyawnonho naar̂atken̂e okwe amna xat pîn komo.

11 Tîîxat pîn komo ya amna mar̂mapoi. Amna pun tonon̂e wara ro mak naxe kahn̂eru pun yonon̂e wara. Amna makpayakn̂e ro mak okwe mîk hak maywen komo cheka ro mak.

12 Ayananî cma re amna. Wara rma amna tko mîmyasî mîk hak maywen komo ya epethîmra ro mak okwe. Epamra ro mak xakn̂e apurantan okwe amna tîmrî ke thakwa yîwya so.

13 Tîmîtwono komo nîwîrîyakarî me amna miir̂as okwe. Etaporetopo komo me marha amna miir̂as okwe. Amna poko mak n̂ewrexe kica.

14 On wara kexe mîk hak maywen komo ceseyataw so, Ixaw Yanatho mak amoro kica, kexe okwe. N̂epanamexe ro mak kica amna yosotî yentache.

15 Tîwîrîyakaxmu me mak wasî ahnoro kaamo po. Tîhyapamsom me mak oyewru n̂esenpesî.

16 Ero wa wasî opoko etaporerî ke so owîrîyakan̂e komo, Ai okre, kan̂e kom ha. Ooxatî pîn komo oyemetanmekyaxe. Opoko tî n̂esepanîyatu. Ero ke tîhyapamsom me kesenpesî.

17 Ero wa thakwa xatken̂e amna poko. Apoko eponarononkara rma tko xakn̂e amna. Amtapotachonhîrî yewetîn̂e me roro nas amna, kacho ponaro rma amna nasî etowra.

18 Aaxatîmnokara rma xakn̂e amna. Awesamarî yai etowra marha xakn̂e amna.

19 Amna yerewnukn̂e wara rma tko mîxakn̂e oko. Kamara warai yewtarî me mak amna yewtontho miir̂e okwe. Amna marha mahrui awarpan ke amna waihtopo ke okwe.

20-21 Ponaro amna yehtopo yosotî poko yîtwen̂ekarînwataw ketaw ha re amna ya ero wa amna yehtopo rma n̂enîrî Kaan. Amna marha n̂enîrî Noro, ponaro anarî yana komo yehtopo wece amna yapockanwataw ketaw ha re. Enîhnî yenîn̂e ro tko Mîkî Kaan kesehtînotopo komo yenîn̂e ha.

22 Wara rma on wara nas amna kaamo poko, twaihkaxmu me mak nas amna pen ayanan me amna yexirî ke mak. Kahn̂eru wara mak amna pen n̂een̂axe amna xatî pîn komo, twaihkaxmu me mak okwe.

23 Apakak Apa. Ahce kacho mîwînîkya? Awomko tak. Eroromero amna ahsîpînkara esko.

24 Ahce kacho mesewyahruya okwe? Ahce kacho amna yahwokacho ponarono pîn wara mai okwe, amna yemetanmetopo ponarono pîn wa ha?

25 Roowo pona roro katuhkem wara nas amna ropotarî okwe. Roowo poko mak n̂etahsîyas amna pun.

26 Ero ke awomko amna yakronomachome. Amna tak ahsîko hara. Ero wa amna ahsîko amna wakren̂e ro me awexirî ke. Ero wa amna ahsîko.