On wara wîîkes awya Apa, Kir̂wan mîkro, mîîkesî cma re opoko owîrîyakan̂e komo ya. Kaan ponarono pîn mîkyam owîrîyakan̂e kom okwe, cesemîknosom me marha naxe kica, kicicme ro mak okwe. Ero ke opokora ro mak tak n̂examro cirko Apa.

2 Kaan xa Amoro, owacan warai, yahcono warai ha. Ahce wa oyexirî ke ow mahsîpînkai? Ahce wa oyexirî ke tîwrataro mak ketar̂a okwe? Ahce wa oyexirî ke ooxatî pîn komo n̂emetanmekrî me wai okwe?

3 Ow weipoko aweyuru ke. Yaarono marha ekatîmko owya amtapotarî. Ero yipu tak nasî oyesamarî yenpon̂e me amîn yaka xa owtotome, awekenî ro pona, îh pono pona.

4 Iito oyexitaw tak Kaan ya tîmsom yakn̂itopo yaka kîwcesî, Kaan yaka rma xa. Iina kîwcesî oyahwotachome Noro poko. Noro xa Mîk tahwore oyehtopo ro. Iito waano waar̂asî kir̂wan̂he awehtopo pokono. Raatî yakro waar̂asî, tawyockem yakro. Kaan xa Amoro Apa, ponaro oyehtopo. Ero wa wîîkes awya Apa.

5 On wara tak wîîkes owya rma, ahce poyero ahwora wai okwe? Ahce poyero keserepoke okwe? Kaan pona xa enko, wîîkesî owya rma. Noro poko rma wa kahwowas amn̂e oyahworen̂e me exirî ke, ponaro oyehtopo me exirî ke ha, wîîkesî. Ero wa wîîkes owya rma.