Waano Yaan̂e N̂enîrî On, Kore Mumuru Komo Wanorî

1 On wara wîîkesî Kaan ya, Amîtwo xa oyexi xe ro mak was Apa. On wara nasî kooso cerekayakayanataw, tuuna yaporî xe xa nasî cerewre. Ero wa xa marha was ow hara apoko, awenî xe ro mak wasî.

2 Owokru xe oyexitawno wara wasî Kaan poko. Noro ponarono me oyexi xe ro mak wehtîkesî, waipînî ro ponarono me. Ahcemaw xa kîwce Kaan yenso?

3 On wara makî ka was ow okwe, oyewyokutho yemen̂e wara was okwe katpanaw, kosope marha. On wara kexe tooto komo owya, Ahto ma nai hara Kaan awya, ponaro awehtopo ha? kexe okwe. Emapona roro ero wa kexe owya.

4 On wara cma re ka wîxakn̂e pahxa, mer̂pono pîn komo yakro kîwcekn̂e Kaan mîn yaka. Poturme kîwcekn̂e ow Kaan poko tahwotaxmu komo yakro. Kir̂wan̂he Kaan nai ham okre, tkaro amna cekn̂e. Amna marha nahwowakn̂e okre. Ero wa oyehtoponho ponaro rma wasî. Ero ke kesekatîmtîkesî ro mak Kaan ya.

5 On wara tko wîîkes owya rma, ahce poyero ahwora wai okwe? Ahce poko wa keserepoke? Kaan pona xa enko, wîîkesî owya rma. Noro poko rma wa kahwowas amn̂e oyahworen̂e me exirî ke.

6 Ahwora tko was Apa. Ero ke aponaro xa tak wasî Xotaw woskaran po oyexitaw. Ero ke Ehmon Yîpîn ween̂asî, Miisa Yîpîn marha. Ero yipu yeen̂ataw owya aponaro xa tak wasî.

7 Apa, kahxi wara ro mak n̂ewtunasî anakîtothîrî tuuna imo. Weyun nasî tîmtapotaxmu wara anarî weyun yakro. Oyopo ro mak cee okwe yamarataka mko anakîtothîrî mer̂pono pîn, porin komo xa.

8 Oyahworesî rma tko Kporin komo ooxe cehtopo ke. Katpanaw oyahworen̂e n̂en̂epesî ohyaka. Kosope Noro wanorî nas hara oropotaw. Kaan yakro omtapotacho rma mîn waano, waipîn me orin̂e yakro omtapotacho ha.

9 Toopu warai Mîk Kaan oyapon warai ha. Ero ke Noro ya wîîkesî, Apa, ahce poyero twen̂ekarî mai opoko? Ahce poyero tîwrataro mak ketar̂a? Ahce poyero ooxatî pîn komo n̂emetanmekrî me wai okwe?

10 Ahwora ro mak wasî etaxikwotîkaxapu wara. Owîrîyakexe ooxatî pîn komo, kaamo poko nîmtapowaxe oyakro. On wara kexe, Ahto ma re nai Kaan awya, ponaro awehtopo ha? kexe owya okwe.

11 On wara tko wîîkes ow owya rma, ahce poyero ahwora wai okwe? Ahce poyero keserepoke xa okwe? Kaan pona xa enko, wîîkesî owya rma. Noro poko rma wa kahwowasî amn̂e oyahworen̂e me exirî ke, ponaro oyehtopo me exirî ke ha, wiikesî. Ero wa wîîkesî owya rma.