Waano Yaan̂e N̂enîrî On, Tapi Wanorî.

1 Tawake xa naxe cesemetanmesom pînîn yawno komo. Noro yipu komo nakronomesî Kporin komo n̂examro yesemetanmekyataw so hara.

2 Noro yipu komo nukurunpesî Kporin komo, waipîra n̂iir̂asî. Tanî rma exitaw so roowo po nakronomesî, yiixatî pîn komo ya emetanmekpora so marha nasî.

3 Amotoyataw so karihcesî marha Kporin komo. Okohme exitaw so waipîra rma n̂iir̂asî. Ero wa nasî Kporin komo cesemetanmesom pînîn yawno komo poko.

4 Taa, on wara wîîkekn̂e Kporin komo ya, Apa, opînîn yaw xa cma re masî. Oropotarî akir̂wamak hara. Kicicme wîxakn̂e kica apoko, wîîkekn̂e.

5 On wara kexe ooxatî pîn komo opoko, owîrîma xatî kom ha, Ahcemaw noro pen waihya, ahcemaw osotî n̂ehcamnoya? kexe opoko okwe.

6 Anarimaw so oyenso mokyaxe ooxatî pîn komo. Ero pîntho poko mak nîmtapowaxe oyakro. Ohyaw cexitaw so kicicme oyehtopo yenî xe naxe. Ohyai tîtoche so hara, Ero wa nai ham kica, kexe opoko tohnaw ro mak.

7 Ahnoro ooxatî pîn komo n̂esencexe oyemetanmetopo poko. Ehtura mak n̂esencexe owîrîmacho poko okwe.

8 On wara kexe, Eper̂a kr̂a tak nahsî. Awomura kr̂a tak nas amn̂e. Kuywa po mak nasî yîhtora ro mak, kexe okwe opoko.

9 Oyakrononho meero tak ooxera nas okwe, ohyaw rma reha n̂eseresmekn̂e. Pona owya entoponhîrî mîk xakn̂e. Noro rma tak nasî tîhtarî ke oyetapan̂e me.

10 Ero ke Amoro xa opînîn yaw esko Apa. Ow karihtoko oyesepantome tak n̂examro poko.

11 Kir̂wan̂he ow meen̂a ham. Enko xe, oyopono me exihra rma nasî ooxatî pîn.

12 Aponarono mak ow anarî ponarono pîn. Ero warai me roro ow miir̂asî. Awepatawno me roro xa ow miir̂asî eroromero, wîîkesî. Ero wa wîîkes awya Apa.

13 Ero ke on wara wîîkesî yîtîhkarî me tak, Kir̂wan̂he mai ham okre Apa, kapore nasî Kporin komo ya, ponaro Ixaw Yana komo yehtopo ya. Pahxa ro mak ero wa kapore xakn̂e, ahce na mko exihra ro mak exitaw. Miya roro marha ero wa kapore nasî yîtîhkan me ro mak. Ero wa ka xe wasî. Yaaro xa ero wa wîîkesî.