Waano Yaan̂e N̂enîrî On, Tapi Wanorî.

1 On wara wîxakn̂e, Kporin komo momokrî poko wîxakn̂e expokan me rma. Owece tak Noro n̂etaknamekn̂e omtapotarî yentachome. Cerewre wîîkekn̂e yîwya oyakronomacho poko.

2 Ewtarî yai oyanîmyakn̂e apacakrî ken̂arî yai, kahsîn̂e yai ha kica. Toh pona tak oriyakn̂e. En̂exa tak oyar̂akn̂e epîrkan me ro mak.

3 Omtaka tak waano n̂iir̂akn̂e yaxan, kir̂wan̂he Kaan yehtopo pokono, ponaro kehtopo komo pokono ha. Oyanîmtoponho tak n̂een̂axe amn̂e mer̂pono pîn komo. Ero ke twerî tak naxe Kporin komo poko. Noro pona marha tak n̂een̂axe.

4 Tawake xa naxe Kporin komo pona enîn̂e komo. Ero wa naxe cehcoyoponkaxmu ponarono pîn komo, cemaro yewetîn̂e ponarono pîn komo marha.

5 On wara wîîkes awya Apa, mer̂pora ro mak nasî an̂irithîrî, amna yeserepokacho ha. Mer̂pora ro mak nasî awesehtînotopo amna poko. Ero yekatîm xe oyexitaw, pîra ro mak was okyo. Yukuknomarî yopo ro mak nasî.

6 On wara kahra mîxakn̂e owya, Awokuthîrî pun akn̂iko owya tîmsom me, ahce na tîmko owya. Yîmton me takn̂isom men akn̂iko, kicicme awehtoponhîrî yahrutopo marha akn̂iko, kahra mîxakn̂e owya. Ow xa matko mîpanayatpekn̂e.

7 Ero yinhîrî on wara wîîkai awya, Ai Apa, kmoko tak ha. On wara kacho nasî tmewreso akaritan yaw.

8 Tahwore xa was Apa awewetîtopo poko. Ponaro oyehtopo Amoro. Awya kpanatanmetopo nasî oropotaw, kacho nasî tmewreso.

9 Kir̂wan me xa cexpore nasî, kacho wekatîmyasî esenmexapu komo ya mer̂pono pîn komo ya. Tîtken̂e mak exihra ro mak was Apa. Ero wa oyehtopo meen̂asî rma.

10 Kir̂wanî ro me awehtopo yeyamra was oropotaka. Kemîknon̂e pîn me awehtopo wekatîmyasî. Kakir̂waman̂e me awehtopo marha wekatîmyasî. Eyamra ro mak wasî kwakren̂e me awehtopo. Amtapotachonhîrî marha eyamra wasî yaarono me exirî ke. Wekatîmtîkesî xa matko esenmexapu komo ya, mer̂pono pîn komo ya ha.

11 Apînîn yawra tak was okwe, kahra cma re mas owya Apa. Okurunpen̂e me rma esko ooxe awexirî ke. Amtapotarî ponaro oyexirî ke marha ow yukurunpeko, yaarono ponaro oyexirî ke ha.

12 Oyesemetanmecho chew ro mak was okwe yukuknomarî yopono chew. Kicicme oyehtoponho rma tak oyahsîy okwe. Ero yanme rma yîhkantara was okwe. Mer̂pora nasî kicicme oyehtoponho. Mer̂pora ro mak nas ohpoci, ohtîpîrî pokono. Ero yopo ro mak nas okwe kicicme oyehtoponho. Ero ke kahwokesî ro mak tak okwe.

13 Kir̂wan̂he takî cma re ow miir̂as Apa. Yohno ow akronomatamko.

14 Owaika xatî komo reha yîhyapamnoko. Cesewkukmaxmu me tak n̂examro cirko. Owîrîma xatî komo porohkakî. Cehn̂axmu me mak enpoko. Ero wa cirko oyemetanmekî xatî komo.

15 On wara kexe opoko, Ai kr̂a, ai kr̂a, kexe. Ero wa kan̂e komo nahwokatîkacowpe camkî cehtopo komo yanme.

16 Awenî xatî komo reha nahwotacowpe. Tawake xa n̂ehcowpe apoko rma. Awya takronomacho ponarono komo marha mîkyam, Ero ke on wara kacowpe, Kir̂wanî ro xa Mîk Kporin komo, kacowpe.

17 Cesemetanmesom mak ow, asak mak nas oyemyawno okwe. Wara rma oponaro nas Oporin, wîîkes apoko Apa. Oyakronoman̂e Amoro, okurunpen̂e marha. Ero ke ecmamra cma re masî oyakronomacho poko. Ero wa cma re mas Apa.