Waano Yaan̂e N̂enîrî On, Xetutun N̂enîrî. Tapi Wanorî On.

1 On wara wîîkekn̂e oropotaw, Twerî tak wasî ahce wa so na oyexitaw. Kicicme yîmtapotara ro mak tak wasî. Xapari potmitopo warai ke kemtamiyasî. Ero wara xa wasî kicicme cehsom komo exitaw ohyaw, wîîkekn̂e.

2 Ero ke tîtken̂e ka wîxakn̂e. Kir̂wan poko meero yîmtapotara wîxakn̂e. Ero wara oyexitaw tko ahwora wehtîkekn̂e mak okwe.

3 Ocorono wara n̂ehtîkekn̂e oropotarî. Oyehtopo poko kesehtînoyakn̂e. Ero wa oyesehtînoyataw wehto ken̂arî wara ro mak xakn̂e oropotarî. Ero ke kîmtapowakn̂e xa hara.

4 On wara wîîkekn̂e Kaan ya, Apa, owaitopo cma re mukuknomesî on̂entarî me. Ero wicakî pahkînon nas amn̂e awenmacho roowo po, mîîkesî cma re owya. Kar̂penî ro mak ow, kacho ponaro ow cirko.

5 Kamorî wicakî kyam mak mukuknomekn̂e waipîra oyehtopo pahkînon. Asak man wa kyam mîhtînoyasî cimn̂ipu waipîra oyehtopo. Roowo po amna yehtopo nasî kapepen wicakno me kyam mak. Ero wa nasî karitî komo yehtopo meero.

6 Ekatî warai cik mak amna tooto komo, kaamo n̂enpotho warai. Miya so n̂etar̂axe tooto komo. Kar̂pe so cexe cemyawno komo poko. Tohnaw kyam mak n̂ekaricexe okwe. Cemyawno komo rma re n̂epamnoyaxe. Onoke na oyemyawnonho nahsîya amn̂e? kexe mak.

7 Taa, Apa ahce wa na ori xe mai? Amoro ha tko. Apona mak ween̂asî. Oyeceton̂e me xa kîhtînoyasî.

8 Awanwekn̂e me wîxakn̂e Apa kica. Ero warai mera takî cma re ow miir̂asî. Akpîra cehsom komo yetaporetopo mera cma re ow miir̂asî.

9 Amoro xa tko on wara ow miir̂akn̂e, ahwokaxapu me ow mîîr̂akn̂e. Ero ke tîtken̂e wîxakn̂e, yîmtapotara ro mak.

10 Kar̂pera ow miir̂akn̂e. An̂ekpothîrî cma re mowyasî oyeper̂an. Ero wa cma re ow miir̂asî. Oyopo xa oyetapan̂e wara mas oko, awamorî ke oyetapan̂e wara.

11 En̂ekano rin̂e Amoro, panareno rin̂e marha. Ero wa panareno miir̂asî kicicme exirî komo ke. Ero wa panareno riyataw awya tamatama wara kyam mak tak nas amna tooto ha. Yohno tpoxunkaxmu me nas amna, kapepen wara kyam mak.

12 Omtapotarî cma re mencesî Apa. Cerewre xa kîmtapowasî. Ow akronomatamko, wîîkes awya. Owratacho yencetaw tîtken̂e exihra cma re masî. Ahyawno rma re ow. Ayanan pîn wara tko was okwe, anarî rotho wara mak okwe. Ero wara xa marha xatken̂e oporin pen kom hara.

13 Yarî cewru cma re mesewkor̂mesî owecera tahwore oyehtome xa hara. Ero wa oyexi xe wasî owaipîrarî ha ka, ehcamnopîra ka oyexitaw. Ero wa oyexi xe wasî.