38
Tapi Wanorî On. Ero Xe Wasî, Kacho On. Kicicme Cehtoponhîrî N̂ekatîmyasî Tapi. Kaan Pona Rma Tko N̂eenasî
1 Apa Kah yawno, owî cma re yîtwermara masî arwon me. Owî cma re panarera marha masî arwon me.
2 Awuhre ke ow mîwes oko. Ow merewnukyas oko.
3 Opoko arwonîmrî ke kar̂pera tak nas opun. Kir̂wan̂he exihra nas oyocho. Ero wa nasî kicicme oyehtoponho yanme.
4 Oyopono wara nasî kicicme oyehtoponho. Oyerewnukn̂e wara nasî awci wara, tapatawno pîn wara.
5 Ereh ken̂e marha wasî tîkmotaxmu ken̂e. Opetakman̂e wara mak nasî kica. Ero wa wasî panahnî me oyehtoponho ke kica.
6 Kahwokesî ro makî. Kîkatwasî ro mak roopore cehso ro. Kaamo poko ketar̂asî tîwrataro.
7 N̂erewasî ro mak opetî oko. Kar̂pera ro mak nas opun ahnoro mak.
8 Etapaxaputho wara ro mak was oko. Kar̂pera ro mak wasî. Kahwoketîkesî ro mak okwe. Okwe okwe, karî poko mak wasî.
9 Ahce xe so na oyehtopo nas an̂enîrî me Apa, kir̂wantawno wara. Opokacho marha meen̂asî.
10 Tohtohtoh kes ocoro. Kekar̂kesî ro mak okwe. Cewxîrîtpe marha was okwe.
11 Oyakrononho komo tak omamrikyaxe oyerekrî yanme. Oyanan komo meero mokuhra naxe meyehra. Mooxe mak n̂ecececexe.
12 Naxe marha owaika xatî komo okwe. Tîmîyen komo n̂iir̂axe oyemcinotopo. Oyemetanmekî xatî komo nîmtapowaxe owîrîmacho poko. Kaamo poko oyemîknotopo ponaro mak naxe kica.
13 Panahnî wara tko wasî, yîmtapotarî komo yentan̂e pîn wara. Yîmtapotan wara marha wasî, tîmtarî yahrunkan̂e pîn wara.
14 Panahnî wara wasî, yîmtapotan me marha, keyukn̂e pîn me ha.
15 Apona rma tko ween̂as Apa. Omtapotarî mencesî rma wa. Kporin komo xa Amoro ponaro oyehtopo.
16 On wara wîîkekn̂e awya, Anarimaw turai kee ohtarî. Ero wa oyexiche n̂examro yîtîtmamnoko Apa. Ai okre, kamexpora esko yîwya so. Noro yopo kr̂a tak taxe okre, kamexpora esko yîwya so, wîîkekn̂e awya.
17 Epîrkaporo tak was okwe. Kerewasî roro eserewkara ro mak oko.
18 Kicicme oyehtoponho wekatîmyasî. Keserepokesî ro mak kicicme oyehtoponho poko.
19 Karitî komo xa mîkyam ooxatî pîn komo, ekar̂kan kom ha. N̂epamtîkexe mak okwe noro yipu komo. Tohnaw ro mak ooxera nat okwe.
20 Twakren̂enhîrî komo yemetanmekn̂e me naxe anarî komo. Noro yipu komo naxe ooxatî pîn me okwe. N̂epamtîkexe mak okwe tohnaw ooxatî pîn komo.
21 Apa kah yawno, owî cma re ahsîpînkara rma masî. Mooxe exihra esko. Kaan Amoro, ponaro oyehtopo.
22 Yohno cma re mîmokyasî oyakronomaxi. Oporin Amoro oyakronoman̂e ro ha. Noro yipu xa Amoro Apa.