Tapi Wanorî On.

1 On wara wîîkes awya so, esewrucpera ehcoko kicicitho pokono komo poko. Noro wara xa oyexi xe was okre, kahra marha ehcoko kicicitho pokono komo poko.

2 Cuuputho wa mak naxe noro yipu komo yohno tawotosomtho wa. Peen wara marha naxe yohno taawaisom wa hara.

3 Kporin komo pona xa matko encoko. Kir̂wan̂he marha ciino ciicoko. Ero wa awexitaw so awewton komo po rma maxe pahkî. Anahmexe roro so marha Kporin komo yîtwen̂ekarîntara.

4 Tpoxwe ro mak Kporin komo encoko. Ero wa awexitaw so yiixe xa awehtopo komo tak nîmyas awya so.

5 On wara kacoko Kporin komo ya, Awanme mak oyexi xe was Apa. Apona marha ween̂asî, kacoko. Ero wa ketaw awya so ehn̂ara awir̂axe so Noro.

6 Kir̂wan me marha awenpexe so enmarî wara ro mak okre, Kir̂wan̂he awehtopo n̂enpesî awakrono komo ya kamarakataw kaamo katparexe so, ero wa awehtopo yenpon̂e me nasî.

7 Kporin komo pona mak encoko cerepore roro awehtome so. Noro ya awakronomacho komo momohcoko eserepokan me mak. Esewrucpera ehcoko tpoyino komo yopono me ehtîketaw anarî komo, kicicitho poko cesehtînosom kom ha. Ero yipu na n̂iir̂atu ehn̂ara ro mak okwe. Wara rma esewrucpara ro mak ehcoko.

8 Yîrwomnî me tak ehcoko, yîrwomnî me ro mak ha. Esewrucpara marha ehcoko. Kicicme mak mehtîkexe amyamro hara awesewrucpetaw so.

9 Roowo po exihra tak naxe amn̂e kicicitho komo. Kporin komo momokn̂e komo reha roowo nahsîyaxe cewton komo me.

10 Yohno mak naxe kicicme cehsom komo waipîra ha ka. Ero yinhîrî tak n̂ehcamnoyaxe okwe. N̂examro na mepor̂at ha re anarimaw, enîhra rma tko maxe.

11 On wara tko naxe tîrwonporem komo reha, roowo tak nahsîyaxe. Cerepore roro mak naxe okre.

12-13 On wara reha naxe kicicme cehsom kom hara, kir̂wan komo yar̂macho poko n̂esehtînoyat okwe. Tmayan̂em wara ro mak naxe kopi. N̂ewresî makî tko Kporin komo noro yipu komo poko. N̂epahnokesî tak n̂examro yar̂macho kaamo ha, kesî mak poko so.

14 Tîkaciparan komo mohkexe kicicme cehsom komo esemetanmexapu komo waihkachome. Tîkrapan komo marha n̂ehsaxe noro yipu komo wotohme. Kir̂wan komo waihka xe naxe cerewre ro mak okwe.

15 N̂eparaxkexe makî tko tîkaciparanthîrî ke so rma tîcorothîrî komo poko rma. N̂etaxikwesî mak tak yîkrapanthîrî kom hara. Ero wa naxe kicicme cehsom kom okwe.

16 On wara naxe kir̂wan komo reha, asak mak exitaw emyawno komo ciki cerepore rma naxe. Erepora reha naxe kicicme cehsom komo mer̂pono pîn ke cemyawnoyemu rma.

17 On wara naxe kicicme cehsom komo amn̂e, aporî komo naxikwesî Kporin komo. Kir̂wan̂he cehsom komo reha n̂ecehcesî Noro.

18 Kir̂wan̂he cehsom komo yenmacho nukuknomesî Kporin komo. Ero wicakî mak nasî kaamo waipîra ehtopo komo, kesî. On wara marha naxe kir̂wan̂he cehsom komo, eroromerono me nahsîyaxe Kaan nîmîtho.

19 On wara marha naxe kir̂wan komo, n̂esemetanmekyaxe rma re anarimaw so. Ero wa cexitaw so ahwokara rma naxe. Rooma poko exitaw so cerepore rma naxe. Ero wa naxe kir̂wan komo.

20 Kicicme cehsom komo reha waihyaxe, Kporin komo xatî pîn kom ha. Cuuputho wara rma naxe woskara pono wara. Yohno rma waihyasî cuupu iitono. Ero wa xa marha Noro xatî pîn komo n̂ehcamnoyaxe hara, wehto yîsîn wara mak n̂ehcamnoyaxe okwe.

21 On wara marha naxe kicicme cehsom komo, tpoyino komo purantan nahsîyaxe tîramansom me hara. Yîramanpîra rma tko naxe hara okwe. Kir̂wan komo reha nîmyaxe yîramanpîn me ro mak.

22 Kporin komo nwakrerî komo roowo nahsîyaxe. Yînwîrîmarî komo reha waihyaxe mak okwe.

23 Kir̂wan komo yetaritopo n̂enpesî Kporin komo. Tawake nasî Kporin komo tîn̂enpothîrî yaw roro torî ke.

24 N̂ehroketu rma na anarimaw so. Cerewre xa epîrkara tko naxe. Kporin komo rma ecehtono n̂iir̂asî tamorî ke. Ero wa kir̂wan komo n̂ecehcesî Kporin komo.

25 Pahxa kar̂pamxan me ka wîxakn̂e. Poritomo me tak was oroto. On warai yenîhra tko wasî kir̂wan komo, Kporin komo nahsîpînkatho me ehxapu yenîhra ro mak wasî takîhsom. Kir̂wan komo yepamrî marha ween̂asî. Oyuru thakwa tîmcoko, kan̂e yenîhra wasî noro yipu komo yepamrî.

26 On wara naxe n̂examro, cesemetanmesom komo pînîn yawno me xa matko naxe. Cemyawno komo nîmyaxe emyaka so. Ero ke Kaanî nwakrerî me marha naxe yîmxîkrî kom hara. Ero wa naxe kir̂wan komo reha.

27 Ero ke ero wara ehcoko, kicicitho yai ro mak etocoko. Kir̂wan̂he mak ehcoko. Ero wa awexitaw so waipîn me tak maxe miya roro.

28 Yaaro ciino rin̂e komo xe nasî Kporin komo. Tînakir̂wamathîrî komo yahsîpînkara ro mak nasî. N̂ecehcesî xa matko miya roro. Kicicme cehsom yepamtho komo reha waihkesî mak.

29 Roowo nahsîyaxe kir̂wan komo. Ceken komo me nahsîyaxe eroromerono me.

30 On wara marha naxe kir̂wan komo, takîhsom me mak nîmtapowaxe. Yaaro ciino ritopo poko mak nîmtapowaxe.

31 Ponaro n̂examro yehtopo komo mtapotarî nasî yîropotaw so Kaan ya kpanatanmetopo kom ha. Ero ke turai kahra nasî yîhtarî komo.

32 Kir̂wan pen komo wapancexe kicicme cehsom komo waihkachome okwe.

33 Kicicme cehsom komo n̂emetanmekrî me tko kir̂wan komo tînomra nasî Kporin komo. Kir̂wan yen̂ekan̂e komo exitaw, Kicicme mai ham kica, kamexpora nasî yîwya so.

34 Kporin komo ka momohcoko. Noro yesamarî yaw roro mak ehcoko. Ero wa awexitaw so kir̂wan me awenpexe so. Arowonî ro komo tak mahsîyaxe. Kicicme cehsom komo waihketaw yîwya waihkarî komo rma meen̂axe. Ero wa maxe.

35 Taa, anarimaw so tooto ween̂asî kicicme cehsom. Yukurumîkno me tko nasî, antomano rin̂e me, mer̂pono pîn komo yantoman̂e me. Weewe wara ro mak nasî taakem wara, ewtî mexan pono wara. Ero warai ween̂asî kicicme cehsom.

36 Yohno rma tko noro pen n̂ehcamnoyakn̂e hara. Wepor̂akn̂e rma re. Enîhra ro mak tak wîxakn̂e.

37 Ahce wa natu, Kicicme cehsom mîkyam, kacho pîn komo reha. Ehtopo komo ika encoko takîhso. Ahwokan me so tak naxe noro yipu komo amn̂e.

38 Tanwekn̂e komo reha waihkesî Kaan ahnoro. Epamthîrî komo meero waihkesî.

39 Anarimaw kir̂wan komo yesemetanmetopo me na nai. Ero yimaw n̂examro nukurunpesî Kaan, wacan komo wara nasî Noro rma.

40 Noro yipu komo nakronomesî Kporin komo. Kicicme cehsom komo ya waihkapora nasî, n̂ukurunpesî xa matko. Ero wa nakronomesî tukurunpen̂e komo me yîhtînorî ke yîwya so. Ero wa nakronomesî.