Waano Yaan̂e N̂enîrî On. Tapi Wanorî On, Kporin Komo Yanton Wanorî.

1 On wara kesî Kaan oropotaw kicicme cehsom komo poko, Kaan yanwekn̂e me cehsom komo poko ha, Twerî mak ehcoko Kaan poko, kacho ponarora ro mak naxe kica.

2 Tpoyino komo yopono me mak n̂esehtînoyaxe kica. On wara kan̂e me marha naxe, Oyehtoponho esehtînomexpora ro mak nasî. Ero poko en̂ekan me ro mak wasî, kan̂e me naxe okwe.

3 Kicicme so nîmtapowaxe kica, cesemîknoso marha. Takîhso esehtîn̂opîn me tak naxe okwe. Akronomano rin̂e pîn me marha naxe okwe.

4 Kuywa po meero emetanmekno ritopo poko n̂esehtînoyaxe. Ero wa kr̂a xa way ham, kexe kicicme cehtopo komo poko rma kica. Poxunkara ro mak naxe kicicme cehtopo komo, kesî. Ero wa kesî Kaan kicicme cehsom komo poko.

5 On wara xa mas Amoro reha Apa, amna xatî ro xa Amoro. Îîpî wara ro mak nas amna xe awehtopo, kah yaka rorono wara. Kemîknon̂e pîn me marha mas okre. Ero wara awehtopo marha nasî îîpî wara, kah yaka rorono wara xa marha.

6 Kir̂wanî ro me awehtopo marha nasî îîpî wara porin wara. Kpanaren̂e me awehtopo nasî weyun wara yuhnakanî ro wara. Kecehton̂e xa Amoro Apa. Tooto mecehcesî, tooto pîn komo marha. Miyan komo yecehton̂e rma Amoro.

7 Tpoxwem xa mîn amna wakrecho awya. Kapikara xîkrî kurun me nasî yîson yaporî. Ero wa xa marha tooto komo mukurunpesî. Awaporî mamaka tîtosom wara naxe hara.

8 Ahce na komo nai amîn yaw kir̂wan komo okre. Ero poyino ke amna merepotanmekyas okre. Tuuna yepu wara nasî ahworeno ritopo awya. Ero poi twokru merpes amna ya okre.

9 Ahyaw marha nasî waipîn me kiin̂e tuuna pîtho. Kîkatparen̂e xa Amoro Apa. Amna katparerî ke awya katpan pono me xa tak nas amna.

10 Aponarono komo mîwakres Apa. Ero wara rma wakreko roro. Kir̂wan̂he cexi xatî komo wakreko rma kir̂wanî ro me awehtopo ke rma.

11 Ow xa n̂ero kir̂wanî ro, kan̂e komo wahkotoko ohyaka mokuhra ro mak ehtome so. Kicicme cehsom komo ehnanmeko, Miya kr̂a noro pen cen̂epecerî, kan̂e kom ha.

12 Iito rma n̂epîrkexe kicicme ciino rin̂e komo. Tar̂maxi so naxe awomun me thakwa okwe. Ero wa naxe.