Tapi Wanorî On

1 Apa kah yawno, on wara wîîkes awya, owîrîyakexe ro mak anarî kom okwe. Ero ke kir̂wan̂he oyehtopo enpoko yîwya so. Oyakro n̂etar̂mexe ro mak okwe. Ero ke n̂examro yakro etar̂mak Amoro.

2 Awecen̂an ahsîko Apa, asakî rma ahsîko akurun kuripara ciixapu. Ero wa awexiche mawomyasî cma re piiri okurunpetome tak.

3 Arahnu marha ahsîko cecehkem. Ero ke tak owece tmohsom komo wahkotoko. On wara cma re mîîkes owya, Akurunpen̂e ro xa Ow ha, mîîkesî.

4 Owaika xatî komo yîhyapamnoko. Cehn̂axmu me ro mak enpoko. Oyemetanmekî xatî komo porohkakî. N̂examro cirko cesewkukmaxmu me.

5 Puruma pîpîtho wara mak n̂examro cirko ocowo narîrî wara. En̂epen̂e komo me cirko Kporin komo yancun.

6 Awarpape cirko esamarî komo, tapeswe marha cirko. N̂examro weken̂emekrî komo poko antomakî Kporin komo yancun.

7 Ero wa noro yipu komo cirko oyemcinotopo yeyamrî ke, mîîye warai yeyamrî ke ha. Tohnaw ro mak oyemcinopu xe xatken̂e kica. Ewtarî marha nahcetken̂e oyepîrkacho. Tohnaw mak owaika xe xatken̂e okwe.

8 N̂examro xa matko n̂etwîrîmacowpe ponan̂e rma. N̂etamxicowpe tîn̂irithîrî yaka rma mîîye yaka, tîn̂eyamthîrî komo yaka rma. Tînahtothîrî yaka marha n̂epîrkacowpe ewtarî yaka waihtome so tak.

9 Ero wara tak n̂examro pen ciriche Kporin komo ya kahwowasî Noro poko. Kir̂wan̂he ro mak nasî Kporin komo okre okurunpen̂e, wîîkesî.

10 Oyocho meero nasî tîmtapotaxmu me. On wara kan̂e wara nasî, Apa kah yawno, onoke ma re nai awara? Yukurumnî komo yakronoman̂e Amoro. Karitî komo ya iyoponkapora masî. Emyawno komo yarpora marha masî cen̂epan̂em komo ya. Noro yipu komo wahkoton̂e Amoro okre, kan̂e wara nas oyocho.

11 Kicicme oyehtoponho yekatîmn̂e komo tî re nîmtapowaxe opoko. Cerewre nîmtapowaxe okwe. Ahce wa mîxakn̂e ero yimaw, kexe oyehtoponho pînî ro poko mak kica.

12 Oyemetanmekyaxe okwe twakren̂enhîrî komo rma. Oyahwokamexpon̂e ro me mak naxe okwe.

13 Owî reha on wara wîxakn̂e n̂examro poko, amotoyataw so kumixitho wamruyakn̂e ow yîpînîn yawno komo me oyexirî ke. Kporin komo mamakan me tak kesenpekn̂e. Eseresmara marha ka wîxakn̂e ow akro ro so oyerewîmtome. Kaan yakro marha kîmtapowakn̂e poko so tuupe cewru.

14 N̂examro pînîn yaw wîxakn̂e oyakrono pînîn yawno wara, oyakno pînîn yawno wara marha. Kutupenwakn̂e marha onocwan pînîn yawno wara. Ero wa wîxakn̂e n̂examro poko reha.

15 Ero yinhîrî cehrokaxmu wara tak wîxakn̂e ow hara. Ero yimaw tak n̂examro nahwowatken̂e kr̂a oyepîrkacho poko. Oyar̂man̂e komo mokyatken̂e owen̂ekarî. Kicicme so nîmtapowatken̂e opoko yîtîtmamra ro mak okwe.

16 Kaan ponarono pîn komo yakro rma n̂etaporetken̂e opoko ahwotacho komo yimaw so rma kica. Nîyocicinwatken̂e mak owece kica.

17 Apa, atî wicakî pahkî ow meen̂a pohnî me mak? Reaw wara mak naxe oko ooxatî pîn komo oyeska xatî wara. Owaikapora cma re masî yîwya so. Tpoxwem xa mîn waipîra oyehtopo. Ero ke owî cma re mukurunpesî.

18 Ero yinhîrî kir̂wan̂he awehtopo wekatîmyasî mer̂pono pîn komo ya esenmexapu komo ya. Awya okurunpetoponho wekatîmyasî yîwya so.

19 Awya kr̂a, kamexpora cma re mas ooxatî pîn komo ya. Tohnaw ro mak naxe ooxatî pîn me okwe. Takrono komo wece n̂ewkpinaxe, Noro kr̂a tahsîcerî, kachome. Ero wa kan̂e pîn me tak noro yipu komo cirko.

20 Tawake yîmtapotara naxe okwe. Kicicme nasî noro, kexe xa matko atara kan̂e pîn komo poko rma, cenmayipu komo poko rma kica.

21 N̂emtayankexe mak kica ooxatî pîn komo owece. Ero wa kr̂a xa yo, kexe. Kwero ro so rma kicicme ciino n̂irî ha kica, kexe opoko.

22 Ero wa ehtopo komo rma wa meen̂as Apa. Ero ke tîtken̂e mak exihra cma re masî. Mooxeno wara exihra cma re masî.

23 Apakak Apa, awomko okurunpetome tak. Owîrîmachonho poyero n̂examro en̂ekak hara Apa. Kaan xa Amoro, ponaro xa oyehtopo.

24 Kir̂wan mîkro, kasko Apa opoko kir̂wanî ro me awexirî ke. Awya kr̂a, kamexpora cma re masî yîwya so.

25 On wara marha kamexpora esko yîwya so, Awya kr̂a, noro pen yopo cehcow ham okre, kamexpora esko yîwya so opoko ha.

26 Oyemetanmetoponho poko tahwotaxmunhîrî komo tak ehn̂anmeko hara. Camkîno me tak cirko. Karitî xa kîwyam okre noro pen yopo, kan̂e komo yîhyapamnoko. Awya kr̂a, kamexpora cma re masî yîwya so opoko. Akpîntho me mak tak n̂examro enpoko.

27 Kir̂wan me oyenîn̂e komo reha tahwotaxmu me n̂ehcowpe. Kar̂pe ro mak nîmtapotacowpe kir̂wan̂he Kaan yehtopo poko. Ehn̂an me tanton ciri xe xakn̂e ham. Kir̂wan̂he xa nai ham okre Kporin komo, kan̂e me roro n̂ehcowpe. Ero warai me n̂examro cirko Apa.

28 Ero wa ciino riche awya kir̂wanî ro me awehtopo tak wekatîmyasî mîk hak ya. Kir̂wan̂he xa nai ham okre Kporin komo, wîîkesî. Kaamo poko ero wa wîîkesî. Ero wara wîîkesî.