Tapi Wanorî On Wara Noro Yehtoponho Pokono, Abimereke Yaw Tî Xakn̂e. Tîmtawaimamsom Wara Tî N̂esenpekn̂e Iito. Ero ke Noro N̂en̂epekn̂e Hara Abimereke. Ero Ke Tî Cekn̂e Tapi.

1 Kporin komo poko kahwowasî roro ero yimaw mak kacho mera. Kir̂wan̂he Kaan nai ham okre, kacho poko kîmtapowasî roro.

2 Kir̂wanî ro me Kporin komo yehtopo poko kîmtapowasî. Tahwore omtapotarî n̂encexe, Kar̂pen mak ow ha, kan̂e komo.

3 Kir̂wan me xa Kporin komo yehtopo poko amtapotacoko oyakro. Iito re tîmtapotacerî Noro yosotî poko.

4 On wara wîxakn̂e pahxa, Kporin komo mtapotarî yenta xe wîxakn̂e. Ero ke oyeyukyakn̂e. Erasîn me tak oriyakn̂e mîn hak poko cerahsomînhîrî rma.

5 Kporin komo pona n̂een̂atken̂e anarî kom hara. Ero ke cewtawake ro mak tak naxe. Tîhyapamtopo ken̂ehra ro mak tak xakn̂e ewru komo.

6 Oyesemetanmekyataw Kporin komo yakro kîmtapowakn̂e cerewre. Ero ke omtapotarî n̂encekn̂e. Esemetanmekîra tak oriyakn̂e.

7 On wara nasî Kporin komo yancun, Kaan poko tweeno komo mamhokono me roro nasî yukurunpen̂e komo me.

8 Kporin komo xe ka yukukmacoko, Kir̂wan̂he nai ham okre, kachome tak awya so. Tawake naxe Noro pona enîn̂e komo.

9 Kporin komo poko twerî men ehcoko amyamro yînakir̂wamathîrî komo. Esemetanmekîra ro mak naxe Noro poko tweeno komo.

10 Anarimaw so reaw komo n̂ekar̂kesî kar̂pamxan warai rma. Rooma poko na nai anarimaw. Kporin komo yenî xatî komo reha esemetanmekîra ro mak naxe.

11 Okopuci komo, amohcoko ka xiya omtapotarî yentaxi. Kporin komo ponaro xa awehtopo komo poko kpanatanmekyaxe so.

12 On wara wîîkes awya so, cerepore roro awenmapu xe so na matu. Awaipu xera so marha na matu pahkî n̂he.

13 Ero wa awexi xe awexitaw so kicicme yîmtapotara ro mak ehcoko. Cemarontara marha ehcoko.

14 Kicicitho yai etocoko. Kir̂wan pokono me mak ehcoko. Etpoko tawake oyexi xe ro mak wasî opoyino komo yakro, kacoko.

15 On wara nasî Kporin komo, kir̂wan komo n̂een̂asî roro. Yîwratacho komo marha n̂encesî.

16 Cewîrwoxe nasî Noro kicicitho pokono komo poko reha. Noro yipu komo nîhcamnoyasî ro mak. Osotî komo yentara ro mak tak naxe roowo pono komo.

17 Ow akronomatamko Apa, kexe kir̂wan komo Kporin komo ya. Ero ke yîmtapotarî komo n̂encesî. Esemetanmekîra tak n̂examro n̂iir̂asî roro.

18 Meyehra nasî Kporin komo ahwokaxapu komo mîtwo. Kicicme ro mak was Apa kica, kan̂e komo nakronomesî.

19 Mer̂pora rma re nasî kir̂wan komo yahwokacho. Noro yipu komo tko nahwores hara Kporin komo.

20 Kir̂wan̂he rma nas iyochîrî ahnoro. Cewn̂e n̂hema etaxikwora ro mak nasî.

21 Twaihkaxmu me reha naxe kicicitho komo kicicme cehtopo komo poyero rma. Ero warai me n̂iir̂asî Kporin komo. Cetwîrîmaxmu me ro mak Noro n̂iir̂asî kir̂wan xatî pîn komo.

22 Tanton komo reha n̂iir̂asî twaihkaxmu mera rma. Noro pona enîn̂e komo naxe cetwîrîmaxmu mera ro makî.