On wara wîîkes awya so kir̂wan komo, Ahwotacoko Kporin komo poko. Centapore xa nasî kir̂wan komo mtapotarî, Kir̂wan̂he Kaan nai ham okre, kacho ha.

2 Kporin komo poko ahwotacoko ahpa yakro. Noro pokono aacoko waano 10 ke tawyockem yakro.

3 Yaxan aacoko waano Noro pokono. Yaana me iyorkacoko raatî. Okre, kacoko kar̂pe tahwore xa awexirî ke so.

4 Yaarono xa mîn Kporin komo mtapotarî. Ahce wa so na ciino riyataw tîmtapotachonhîrî yaw roro rma wa n̂iir̂asî.

5 Tawake ro mak nasî Kporin komo kpoko so kir̂wan̂he kexitaw so, yaaro ciino rin̂e me kexitaw so marha. Miya rma nasî Kporin komo ya kwakrecho komo, roowo poko hak mak nas okre.

6 Kaapu komo tî nakîhcekn̂e Kporin komo tîmtapotarî ke rma. Kah yawno komo tî nakîhcekn̂e tapepen ke rma tîmtaino ke. Mer̂pono pînî ro mak nakîhcekn̂e.

7 Tuuna imo n̂enmekyasî Kporin komo iina re een yawno wara rma. Weyunu komo n̂enmekyasî mîîmo yakan wara, kemyawno yîmtotopo yakan wara.

8 Roowo poko hakno komo, awya so wîîkesî, Kporin komo poko twerî xa ehcoko. Ayopono ro komo me xa Noro encoko miyan komo rma ahnoro.

9 Noro nîmtapowakn̂e ahce na yakîhtotopo poko. Yîmtapotachonhîrî yaw roro tak n̂etakîcekn̂e ahnoro. Ero wa esko, kekn̂e ahce na poko. Ero yanme tak ero wara xakn̂e.

10 On wara nasî Kporin komo, mîk hak maywen komo n̂esencexe ahce na poko. Ero wa esentachonhîrî n̂ehn̂anmekyasî. Ero wa xa cehcerî, kexe anarî yana komo. Ero wa kachonho tko n̂ehn̂anmekyasî.

11 Ehn̂ara reha nasî Kporin komo cesehtînotopo poko. Ero wa ciino ri xe wasî, kachonho yaw roro rma wa n̂iir̂asî miya rorono me, kepamthîrî komo n̂enîrî me meero.

12 Tawake naxe kayaritomo maywen komo Kporin komo exitaw ponaro ehtopo komo me. Iyanan komo ro me naxe, Kporin komo nmen̂ekatho me xa. Ero ke tawake naxe.

13-14 Kah yaw nasî Kporin komo ceken po. Mahxa rma tooto yepamrî n̂eenasî. En̂exa tooto komo n̂een̂asî roowo poko hakno komo ahnoro.

15 Kropotarî komo yakîhton̂e marha Mîk Kporin komo. Ahce na poko kehtopo komo n̂een̂asî ahnoro.

16 Sowtatu komo mak na nai kayaritomo kurunpen̂e me tî re, mer̂pono pîn sowtatu ha. Wara rma n̂examro mak exitaw yukurunpen̂e me, yukurumra rma nas okwe. Kar̂pe cehtopo ponaro mak cexitaw twaparî yopono me cehtome, iyopono me exihra rma nas okwe.

17 Tohnaw mak kukurun me ceen̂axe kawaru. Kar̂pe rma re nasî kawaru, kar̂pe xa. Kukurunpen̂e pîn me rma tko nasî noro mak.

18-19 Kporin komo xa tko keen̂axe so tweeno me kexitaw so tpoko, tîpîn̂e kenîn̂e me cehtopo ponaro kexitaw so marha. Noro rma waipîra kiir̂axe so. Rooma pokono me kexitaw so waipîn me kiin̂e Mîk ha.

20 Kporin komo ya kakronomacho tîtmomokyaxe. Kakronoman̂e komo xa Mîk, kecen̂anman̂e komo marha.

21 Noro yosotî pona enîrî ke kîwya so tahwowaxe okre. Kir̂wanî ro mîn Noro yosotî.

22 Amna pînîn yaw cma re mas Apa, apona enîrî ke amna ya. Ero wa cma re masî.