32
Tapi Wanorî On. Kpanatanmetopo On Waano Tawake Taxe Kicicme Kehtoponhîrî Komo Yîhcamnoche Kaan Ya
1 On wara wîîkesî kehtoponhîrî poko, tîhcamnoso exitaw Kaan yanwechonho kîwya tawake ro mak taxe, kicicme kehtoponhîrî tahruso exitaw ha. Ero wa kexitaw tawake ro mak taxe.
2 Tawake xa taxe kicicme kehtoponhîrî komo mewrera exitaw Kporin komo tîkaritan yaka. Tawake marha taxe kesemîknotopo ken̂ehra ro mak kexitaw so kropotaw so.
3 On wara ka wîxakn̂e ow kicicme ehxapu, esekatîmra ka wîxakn̂e. Ero ke kar̂pera n̂ehtîkekn̂e oyocho oyemkutunîmrî ke okwe.
4 On wara marha wîîkesî Kaan ya oyehtoponho poko rma, Apa, oyerewnukn̂e wara mîxakn̂e. Katpanaw so ero wa mîxakn̂e, kosope so marha. Kekar̂kekn̂e mak okwe kaamo yimawno wara ocorono yimawno wara xa.
5 Ero yinhîrî tak kicicme oyehtoponho wekatîmyakn̂e awya. Kicicme oyehtoponho yeyamra tak wîxakn̂e. On wara wîîkekn̂e, Kicicme oyehtoponho tak wekatîmyasî Kporin komo ya, wîîkekn̂e. Ekatîmrî ke tak kicicme oyehtoponho mîhcamnoyakn̂e okre. Ero wa mîxakn̂e opoko.
6 Ero ke ero wa xa marha n̂esekatîmcowpe awya ahnoro aponarono komo Apa. Oroto ha ka n̂esekatîmcowpe awya amna mtapotarî yeyukn̂e me ka awexitaw. Amn̂e tuuna yukmetaw mer̂pora ro mak ero wa cesekatîmsom komo yukmara rma naxe okre.
7 Oyeseyamtopo xa Amoro Apa. Ow makronomesî esemetanmekîra oyehtome. Ow mîwamcesî waano komo ke rma, okurunpetopo pokono ke rma.
8 On wara kesî Kporin komo owya hara, Kweronomesî roro awesamarî poko. Kpanatanmekyasî marha awehtopo poko. Oyewru ke rma kewyaknamesî oyesamarî yaw xa awtotome.
9 Kawaru warahra men esko, muura warahra marha esko. Camkîno komo mîk noro yipu komo. Yîmtayetkacho ke mak noro yipu n̂esewkor̂me, awyoci ke marha. Ero yipu cicir̂asî ewkor̂macho komo kanme so totohme. Ero ke noro yipu komo warahra ehcoko.
10 On wara marha wîîkes awya so, mer̂pora nasî kicicme cehsom komo yahwokacho. Kporin komo pona enîn̂e me kexitaw so reha Kaan ya kwakrecho ke cewamtoso ke xa taxe okre.
11 Ero ke on wara ehcoko amyamro kir̂wan komo, Kporin komo poko ahwotacoko, tawake xa ehcoko. Kar̂pe ewanomacoko ahnoro amyamro kir̂wan̂he awexi xatî kom ha. Ero wa ehcoko.