Waano Yaan̂e N̂enîrî On, Tapi Wanorî.

1 Apa kah yawno, on wara wîîkes awya, apona mak ween̂asî. Ero ke ehn̂an me ro makî cma re ow miir̂asî. Okurunpen̂e me roro esko kir̂wanî ro me awexirî ke.

2 Apanarî aknamakî xiya oyentachome. Yohno cma re mîmokyasî okurunpeso. Toopu warai me esko pona oyececetotopo warai me. Owacan warai me marha esko oyecen̂an me ha.

3 Toopu warai xa Amoro, pona oyececetotopo warai. Owacan wara marha masî oyecen̂an me. Kaan yanan mîkro, kacho me oyexirî ke kir̂wan̂he ow arko.

4 Mîîye warai n̂eyamyatken̂e ooxatî pîn komo oyemcinotopo okwe. Ero yaka kemciyakn̂e okwe. Ero ke ero yai cma re ow mowyas hara oyakronoman̂e me awexirî ke.

5 Oyekatî wîmyas awya Apa. Waipîra cma ow miir̂akn̂e. Kaan xa Amoro Oporin, yaaro xa tîmtapotaxmu ha.

6 Akîhtoxaputho ponarono me mak naxe anarî komo reha. Kakronoman̂e pînî ro mak mîn akîhtoxaputho. Noro yipu ponarono komo xera ro mak wasî. Kporin komo pona enîn̂e makî reha ow.

7 Tawake ro mak wasî opînîn yaw awexirî ke Apa. Kahwowasî ero wa awehtopo poko. Meen̂akn̂e oyesemetanmetoponho. Ahwora ro mak oyehtoponho ponaro marha mîxakn̂e.

8 Ooxatî pîn ya ow ahsîpora mîxakn̂e. Tamtakem pona xa matko ow mekenmekn̂e roowo pona.

9 Apa, opînîn yaw cma re masî. Kahwokesî xa okwe. N̂erewasî tak oyewru owratarî ke. Opun meero marha n̂ekar̂kesî ahwora oyexirî ke. Oyahwokacho pokes okwe.

10 Ahwora roro wasî kaamo poko roro. Yaake cimn̂ipu wenatîkesî, Okwe, okwe kacho poko. Kekar̂kesî ro mak kicicme oyexirî ke ham. Oyocho meero nasî tatîhsom wara.

11 Mer̂pora naxe ooxatî pîn komo. N̂examro nîwîrîyakarî me mak wasî. Owîrîyakexe xa tak omîtwono komo. Poxumra ro mak wasî oyakrononho komo ya. Esama yaw oyeporîche cexe mak ohyai kar̂pe.

12 Waihxapu wara mak oriyaxe, ohcamnoyaxe ro mak okwe. Tahremtho wara ro mak wasî yîwya so etahkaxaputho wara.

13 Mer̂pono pîn komo owîrîyakexe on̂entarî me rma. Mehxa mehxa wara so mokyaxe oyeraspen̂e komo. Oyemetanmetopo poko n̂esencexe okwe. Owaikacho poko meero n̂esehtînoyaxe.

14 On wara tko was ow Apa, Apona mak ween̂asî. On wara wîîkes awya, Kaan xa Amoro ponaro oyehtopo xa, wîîkesî.

15 Ahce wa na orin̂e Amoro. Ero wa tak kiir̂asî ero cimn̂ipu po, ero kaamo po xa, kan̂e ro Amoro ahce wa na oritopo poko. Ero ke ooxatî pîn komo ya cma re oyemetanmekpora masî.

16 Opoko tawake xa esenpoko. Awanton mak ow. Ow yukurunpeko opînîn yawno ro me awexirî ke.

17 Awakro kîmtapowakn̂e Apa, oyakronomacho poko. Ero ke ehn̂an me ro mak ow cirko. Kicicme cehsom komo xa matko cirko cehn̂axmu me hara. Yîmtapotan me tak n̂ehcowpe noro yipu komo roowo cheka ahruxapu wara.

18 Cemaro me mak nîmtapowaxe kica, cehcoyoponkaxmu me marha, n̂etwîrîyakexe marha. Ero wa nîmtapowaxe kir̂wan komo poko kica. Ero ke yîmtapotan me so tak cirko noro yipu komo.

19 Naxe tko apoko tweeno komo. Apona enîn̂e me xa naxe tooto komo weroro rma. Noro yipu komo wakrecho mîmcesî ahyaw rma ha ka Apa mer̂pono pînî ro mak, kir̂wanî ro kom ha. Noro yipu komo ya tîmsom mîn mîmcesî.

20 Noro yipu komo meyamyasî ahyaka rma. N̂examro yar̂macho poko n̂esencexe cehcoyoponkaxmu komo. Anarimaw yîwîrîma xe naxe tîmtapotarî komo ke mak. Amoro tko mukurunpesî, amîn yaka rma meyamyasî.

21 Kir̂wan̂he xa nai ham Kporin komo okre, kapore xa nasî. Ooxe xa cehtopo ro mak n̂enpekn̂e owya ewto imo po oyexitaw twacayem po.

22 Iito oyexitaw kîmtapowakn̂e Kaan yakro yohno ro mak. On wara wîîkekn̂e yîwya, Oyenîra tak mai ham Apa okwe, wîîkekn̂e. Omtapotarî rma tko mencekn̂e, Owî cma re makronomesî, kacho rma.

23 Ero ke on wara wîîkes awya so Kporin komo nakir̂wamatho komo ya, Kporin komo xatî me ehcoko amyamro ahnoro. Tpona enîn̂e komo kurunpen̂e xa Mîkî. Anarî komo yopono me cesehtînosom komo reha n̂epemetîkesî kicicme ehtoponhîrî komo yecenarîno ke ha.

24 Ero ke tahwore xa ehcoko amyamro Kporin komo pona enîn̂e komo. Noro rma aropotarî komo karihcesî. Ero ke ero wa ehcoko.