Tapi Wanorî On. Noro Mîn Tîmtopo Yimaw Taasom On,

1 Apa kah yawno, kir̂wanî ro Amoro okre, wîîkesî. Yuhnawnonhîrî warai ow manîmye okre. Ooxatî pîn komo mîtîtmamnoi. Ai okre, kamexpora mîxakn̂e yîwya so opoko.

2 Apa kah yawno, ponaro oyehtopo xa Amoro. Owî cma re mîkaricesî, wîîkekn̂e awya. Ero ke ow mîkaricekn̂e amotoxapunhîrî.

3 Roowo cheka etahruporo wîxakn̂e okwe. Amoro makî cma ow manîmyakn̂e hara. Ow mîkaricekn̂e hara roowo cheka tohra oyehtome.

4 Taa, on wara wîîkes awya so hara, Kporin komo nakir̂wamatho komo ya makîrha, Kporin komo poko ewanomacoko. Kir̂wanî ro mîn Noro yosotî. Ero ke Noro poko ahwotacoko.

5 On wara nasî Noro yîrwonataw, yohno so mak nîrwonasî. Kwaihtopo pona roro tko nasî tawake kpoko so. On wara na tatu kîwyam, tîwracetu rma na anarimaw. Kosope maki tko tîwracexe. Enmapuche tak tahwore taxe hara.

6 On wara wîîkekn̂e pahxa esemetanmekîra ro mak oyexitaw ha ka, Ahwokan me ro mak wasî, wîîkekn̂e,

7 On wara wîîkes hara Kaan ya, Apa, oyahworen̂e me ka awexitaw oyîpîn mecehcekn̂e esewsîn me. Ero yinhîrî tak esenpora mîxakn̂e hara owya okwe. Ero ke tak kahwokekn̂e hara okwe.

8 Ero ke awakro kîmtapowakn̂e cerewre. On wara wîîkekn̂e awya, Apa kah yawno, opînîn yaw cma re masî.

9 Ahce kacho okamxukru yen̂epe xa mai Apa? Ahce kacho roowo cheka oyetarutopo mîhtînoya? Roowo ma re nahwowa apoko Apa? Yaaro kan̂e ro mak Mîk Kporin komo, nîîke ha ma re ero apoko?

10 Omtapotarî cma re mences Apa. Opînîn yaw cma re masî. Ow cma re makronomesî.

11 Taa, on wara tak ow mîîre hara, tmanîmsom me ow miire okre tîwrataxmunhîrî. Kumixitho mîmohkapekn̂e owya oponontho. Owya tak mamrupekn̂e oyahwotacho hara oponon warai me.

12 Ero wa ow mîwakrekn̂e apoko oyahwotachome oropotaw, tîtken̂e exihra ro mak oyehtome. Ero wa ham okre Apa, kir̂wan̂he ow mîwakrei, wîîkesî tak awya. Miya roro ero wa wîîkes awya yîtîhkan me ro mak. Ero wa wîîkes Apa.