Tapi Wanorî On.

1 On wara wîîkes awya so karitî komo ya, Kir̂wanî ro xa Amoro ham Apa, karitî ro marha Amoro ham, kacoko Kporin komo ya, wîîkesî.

2 Kir̂wan xa Noro yosotî. Ero ke, Kir̂wan xa Amoro ham Apa, kapore nasî yîwya osotî yaro rma. Cenpore xa Mîk Kporin komo, kicicitho ken̂arî pînî ro mak. Ero ke, Oporinî ro Amoro, kacoko yîwya kicicitho ken̂ehra ro mak.

3 Tuuna yopono me nîmtapowasî Kporin komo. Kir̂wanî ro Mîk Kaan. Noro yipu rma nîmtapowasî tarai wara ro makî. Mer̂pono pîn tuuna yopono me nasî Kporin komo.

4 Karitî xa mîn Kporin komo mtapotarî. Kayaritomo me xa nîmtapowasî.

5 Setru yepu yaxikwon̂e mîn Kaanî mtapotarî, Ribanu pono komo kararakesî pin̂ipici me cehso ro.

6 Ribanu pono komo n̂ewsîyasî Kporin komo. Paaka xîkrî wara n̂iir̂asî roowo iitono, tahron̂em wara. Sirion marha n̂ewsîyasî. Paaka wara marha nahronasî iitono roowo kar̂pamxan wara, okno pîn wara.

7 Pepe kacho wara rma cesî Kporin komo mtapotarî.

8 Axawa imo marha n̂ewsîyasî Kporin komo mtapotarî. Kates yaxawanî rma n̂ewsîyasî Noro.

9 Kporin komo mtapotarî yanme marha kooso komo n̂ewruyaxe. Comotanhîrî yaiwan̂e me nasî yîmtapotarî woskara me cehso ro. Tîmtapotaxmu wara naxe ahnoro yîmîn yawno komo. Kir̂wanî ro xa Mîk, kexe.

10 Pahxa roowo ahnoro nukmanîrekn̂e Kporin komo. Tuuna yantoman̂e me rma xakn̂e ero yimaw. Eroromero nasî Noro kayaritomo me, kayaritomo yapon pono me ha.

11 Tîyanan komo karihton̂e Mîk Kporin komo, ahwokan me ciin̂e me marha nasî. Ero yipu ke tîyanan komo wakresî.