Tapi Wanorî On.

1 Apa kah yawno, awakro cma re kîmtapowasî. Toopu warai Amoro oyapon warai. Ero ke yîmtapotan me exihra cma re mas oyakro. Oyeikura awexitaw ewtarî imo yaka toxapu wara tak was okwe.

2 Awakro kîmtapowasî yiixe oyehtopo poko. Cerewre kîmtapowas awakro. Kapockanwasî omtapowataw amînî ro wece. Ero ke omtapotarî cma re mencesî.

3 Kicicitho pokono komo yen̂epetaw awya, Etoko kr̂a amoro meero, kahra cma re mas owya hara. Kicicme cehsom komo yakro rma ow en̂epera esko. N̂examro nîmtapowaxe tawakem wara ha re tîmîtwono komo yakro. Emetanmekî xe so rma tko naxe kica tîropotaw so.

4 Ero ke noro yipu komo epemak tak ehtoponhîrî komo yaw xa marha. Kicicme ro mak xatken̂e ha kica. Ero wa ehtoponhîrî komo yepetho tîmko yîwya so. Yînwîrîmathîrî komo epanîko yîwîrîmachonhîrî komo ke xa marha.

5 On wara naxe noro yipu komo, Kporin komo n̂iritho ponarora ro mak naxe okwe, tamorî ke n̂iir̂akn̂e ero ponarora naxe. Ero ke n̂examro yixkan̂e wara tak nas amn̂e Kporin komo. N̂exaro ciin̂e warai me xa hara exihra ro mak nasî.

6 Kporin komo poko kahwowasî. Omtapotarî n̂entai ham, Opînîn yaw cma re masî, kacho owya.

7 Okariton̂e Mîk Kporin komo, oyecen̂an marha. Noro pona mak ween̂asî. Ero ke oyakronomesî. Oyakronomarî ke kahwowasî ro mak. Kir̂wan̂he xa mai ham Apa okre, wîîkesî yîwya waano yarîrî me rma.

8 Tîyanan komo karihton̂e Mîk Kporin komo. Yînîhkapethîrî wacan warai marha Mîk ha yahcono warai.

9 Ayanan komo yukurunpeko Apa. Anahsîthîrî komo wakreko. Amna yosom komo me esko oper̂a yosom wara rma. Amna arko roro ahsîpînkan me ro mak. Ero wa esko Apa amna poko, ayanan komo poko ha.