Tapi Wanorî On.

1 On wara nasî Kporin komo opoko, oweyuru me nasî, okurunpen̂e me marha. Ero ke onok pona ma re keraswa? Okariton̂e Mîk Kporin komo, waipîra orin̂e ha. Ero ke onok pona ma re keraswa?

2 Kicicme cehsom komo rma re mokyatken̂e oyonoso kr̂a. Ooxatî pîn komo ro mak mîkyam mokyatken̂e. Tmokyataw so rma tko n̂ehroketken̂e cepîrkaxi ro.

3 Anarimaw sowtatu pen na mokyatu owaparî me mer̂pono pînî ro mak. Pona so rma tko erasîra wasî. Waapa komo mokyataw owece Kaan pona rma ween̂asî okurunpetopo.

4 Kîmtapowasî Kporin komo yakro yiixe xa oyehtopo poko. Cewn̂e mak nasî yiixe xa oyehtopo. On wara wîîkesî yîwya, Apa kah yawno, amîn yaw oyexi xe wasî miya roro owaitopo pona roro. Iito oyexi xe wasî kir̂wan̂he ro mak awehtopo yentome, amtapotarî yentachome marha, wîîkesî yîwya.

5 Oyesemetanmekyataw tak Noro rma oyeyamyasî tîmîn yaka. Tîmîn yatumnaka rma oriyasî. Toh pona marha oyanîmyasî kawno pona.

6 Ero yimaw tak ooxatî pîn komo yopono me tak wasî, omamton̂e komo yopono me. Ero ke Kporin komo mîn yaw wakn̂iyasî yîwya tîmsom. Tahwore xa wakn̂iyasî. Kewanomesî marha Noro poko okre. Ero wara wasî.

7 Apa kah yawno, omtapotarî cma re mencesî awakro omtapowataw. Opînîn yaw esko, omtapotarî yeyuhtome tak awya.

8 On wara mîîkes owya anarimaw so, Oyewru ka entamko, mîîkesî. Ero wa kacho yentache owya on wara wîîkesî oropotaw, Taa, awewru yenso tak kmokyas Apa, wîîkesî.

9 Esewyahrura cma re mas Apa. Ow enko rma. Awanton ow ha. Ohyai kr̂a etok ha, kahra cma re masî owya tîrwon̂e. Oyakroman̂enho Amoro. Ero ke oroto ow tînomra esko, ow ahsîpînkara esko. Kaan xa Amoro okurunpen̂e ro.

10 Anarimaw apapa meero na oyahsîpînke, yememe marha na. Ero yimaw tak Kporin komo xa nasî oyenîn̂e me.

11 Apa kah yawno, owî cma re mîpanatanmekyasî awehtopo poko. Kir̂wan yaw ow arko esama yaw, tmemehsem yaw. Ero warai yaw ow arko oyemetanmekn̂e komo exirî ke mer̂pono pîn komo.

12 On wara kahra cma re masî ooxatî pîn komo ya opoko, On ha, moso emetanmecoko awanme ro so, kahra cma re mas opoko. Kicicme oyehtopo yekatîmn̂e komo nîmtapowaxe opoko tohnaw mak kica. Owaikacho poko meero nîmtapowaxe okwe. Ero ke yîwya so owaikapora esko Amoro, wîîkesî. Ero wa wîîkesî Kporin komo ya.

13 Taa, on wara wîîkekn̂e, kir̂wan̂he Kporin komo yehtopo rma tko ween̂as amn̂e waipîra ka oyexitaw, wîîkekn̂e. Ero wa kahra oyexitaw ketaw ha re kahwokatîkarî ro mak ha re okwe.

14 Ero ke on wara wîîkes awya so, Kporin komo ka momohcoko ahwokan me ro mak. Ero wa awexitaw so aropotarî komo karihcesî. Wîîkesî xa hara, Kporin komo ka momohcoko, wîîkesî. Ero wa mak wîîkesî.