Tapi Wanorî On

1 Apa kah yawno, on wara cma re wîîkes awya, Kir̂wan me cma re ow menpesî. Kicicme exihra wîxakn̂e meexa ro omrenai ro. Apona ween̂akn̂e roro. Apohana, kakronome ha ma re Kporin komo, kahra ro mak wîxakn̂e.

2 Oyehtopo enko Apa, yukukmakî kir̂wan̂he na nai noro, kachome awya opoko. Oyesehtînotopo meero yukukmakî, oropotarî marha.

3 Ooxe awehtopo ponaro wasî enmar̂atîxera. Amtapotachonhîrî yaw roro mak wasî ahce na poko oyexitaw, yaarono yaw roro ha.

4 Kemîknon̂e komo yakro eremara wasî. Tohnaw cesenposom komo yakro etarira marha wasî.

5 Kicicme ro mak ween̂asî kicicitho pokono komo yesenmetopo. Kicicme cehsom komo yakro oyerema xera ro mak wasî.

6 Esemokaxapu wara wasî kicicme oyehtoponho ken̂ehra. Ero wa oyexirî ke kmokyas Apa, awya tîmsom yakn̂itopo mîtkoso.

7 Iito oyexitaw, Kir̂wan̂he xa nai ham Kporin komo, wîîkesî opoyino komo n̂entarî me. Kir̂wan̂he awya ciino ritoponho ahnoro wekatîmyasî yîwya so.

8 Tpoxwe xa nasî owya amîn yaw oyehtopo. Kir̂wanî ro me awehtopo mîn me nasî. Ero ke yiixe xa wasî.

9 Roowo poi ow arîhra cma re masî kicicme cehsom komo yakro. Ow waihkara cma re masî waihkano ri xatî komo yakro.

10 Noro yipu komo n̂esencexe emetanmekno ritopo poko, anarmerpa so amna yemetanmetopo poko ha. Emyaw so marha nasî puranta mer̂pono pîn cen̂ekan̂e komo yepemacho kica, esen̂ekapora ro mak cehtamci komo.

11 Kicicitho mîkro, kacho mera ro mak was owî reha. Ero ke twaihkaxmu mera cma re ow miir̂asî. Opînîn yaw cma re masî.

12 Capahno po xa kecececesî. Opoyino komo yesenmekîche n̂examro n̂entarî me kahwowasî kir̂wan̂he xa Noro yehtopo poko. Ero wara wasî.