Tapi Wanorî On

1 Apa kah yawno, aponaro xa wasî.

2 Kaan xa Amoro, ponaro xa oyehtopo, apona xa ween̂asî. Ahce na poko ehn̂ara ro makî cma re ow miir̂asî. Oyar̂mapora cma re masî ooxatî pîn komo ya.

3 Ehn̂ara ro makî cma re miir̂asî apona enîn̂e komo. On warai komo xa n̂ehn̂acowpe, tohnaw ro mak kemîknon̂e komo.

4 Owî cma re makîhres Apa awehtopo poko, awesamarî komo poko marha ow panatanmeko.

5 Ow akîhreko yaarono poko, amtapotarî poko ha. Ow panatanmeko. Kaan xa Amoro oyakir̂waman̂e. Apona mak ween̂asî kokmamso ro.

6 Pahxanî ro Amoro Apa, amna pînîn yawnonho, amna wakren̂enho ha. Ero ke ero wa awehtoponhîrî ponaro xa hara cma re masî oroto rma.

7 Kar̂pamxan me ka oyexitaw kicicme wîxakn̂e kica. Awanwekn̂e me wîxakn̂e okwe. Ero wa oyehtoponho takî cma re mîhcamnoyasî. Kîpînîn yawno ro Amoro Apa, kir̂wanî ro ha. Ero ke oponaro rma cma re masî.

8 Kir̂wan Mîk Kporin komo, kicicme exihnî ro. Ero ke kicicme cehsom komo panatanmekyasî cehtopo poko.

9 Kyopono pîn me cesehtînosom komo panatanmekyasî Noro kir̂wan̂he kehtopo poko. Cehtopo poko rma panatanmekyasî noro yipu komo.

10 Ahce na chere kaar̂ataw so Kporin komo ya, kîpînîn yaw so cexirî ke mak ero yipu chere kaar̂axe so. Yaaro rma wa ero yipu chere kaar̂axe so. Yîmtapotachonhîrî ponaro kexitaw so mak ero wa kaar̂axe so, Awewetîn̂e me nas amna Apa, kachonho ponaro kexitaw so mak ha.

11 Kicicme oyehtoponho cma re mîhcamnoyas Apa. Ero cma re mîhcamnoyasî awosotî yetwîrîyakara ehtome so. Kicicme ro mak wîxakn̂e kica. Wara rma oyehtoponho cma re mîhcamnoyasî.

12 Ahce wa xa kiir̂atu so Kporin komo twerî kexitaw so tpoko. Kpanatanmekyaxe so kehtopo poko. On wara kesî kîwya so, Okopuci, on wara xa esko. Ero wa awehtopo men̂ekekn̂e ow. Ero ke ero poko men esko, kesî kîwya so.

13 Twerî kexitaw so Kaan poko esemetanmekîn me cenmayaxe okre. Kepamthîrî komo marha naxe roowo yosom me amn̂e.

14 On wara marha nasî Kporin komo kpoko so Noro poko twerî kexitaw so, ekatîmnînhîrî rma n̂ekatîmyasî kîwya so. Oponaro awexitaw so ero wa kiir̂axe so amn̂e, kacho n̂ekatîmyasî kîwya so.

15 Kporin komo pona ween̂asî roro. Noro mak ohtarî namxiponkesî mîîye warai yaka etamxixapunhîrî.

16 Apa, owece cewru takî cma re metaknamesî. Opînîn yaw cma re masî. Cewn̂e thakwa tan was okwe, kesemetanmekyasî ro mak okwe.

17 N̂epamtîkesî mak okwe oyahwokamexpotopo. Owî takî cma re miir̂asî ahwokamexpon me.

18 Oyesemetanmetopo ponaro cma re masî, oyerewîmtopo ponaro marha. Kicicme oyehtoponho marha cma re mîhcamnotîkesî.

19 Ooxatî pîn komo cma re meen̂as Apa, mer̂pora ro mak naxe okwe, okwe. Ooxera ro mak naxe, n̂etîrwonmekyaxe ro mak opoko.

20 Waipîn me cma re ow mecehces Apa. Owî cma re makronomesî. Ehn̂an me marha cma re ow miir̂asî. Apona xa ween̂asî. Ero ke ero wa cma re ow miir̂asî.

21 Yaarono cma re ow, kir̂wan̂ marha cma re ow. Ero wa oyehtopo cirko okurunpen̂e me rma. Ero wa ow yukurunpeko apona enîn̂e me oyexirî ke.

22 Apa, ponaro amna yehtopo Amoro, on wara mak tak wîîkes awya, Ixaw Yana komo n̂esemetanmekyaxe ro mak. Ero ke cma re esemetanmekîra tak miir̂asî, wîîkesî. Ero wa wîîkes awya Apa.