Tapi Wanorî On

1 Kporin komo rowon tan on roowo ahnoro. Noro yemyawno me marha nasî ahnoro roowo pono komo, tooto pîn, tooto komo marha.

2 Tuuna imo ratakan me tî roowo nakîhcekn̂e. Tuuna rma tî n̂iir̂akn̂e roowo yapon me.

3 Kporin komo yekenî ro nas îh po. Ahce wa kexitaw Noro yaka tawnukya? Ahce wa kexitaw iitono me tat ha?

4 Amosmumnî me kexitaw so mak tîhcexe iina, esumnî me marha exitaw kropotarî komo, akîhtoxaputho poko ahwotara ro mak kexitaw marha, Yaaro xa tan wîîkesî, kan̂e pînî ro me mak kexitaw so tohnaw.

5 Ero wa kexitaw so Kporin komo nwakrerî me taxe. Kir̂wan̂he kehtopo marha nîmyasî Kaan kîwya so. Kakir̂waman̂e komo rma Mîk ero yipu nîmyasî kîwya so.

6 Ero wa naxe awenî xatî komo, Apa, awewru yenî xatî kom ha. Kaan Amoro, ponaro Xako yehtopo ha.

7 Taa, on wara tak wîîkesî ewto metatan komo ya, Etahrunkacoko amyamro metata. Pahxanînhîrî komo rma amyamro, etahrunkacoko kayaritomo yewomtome tak ahyaro so, kir̂wanî ro yewomtome, wîîkesî.

8 Onoke xa Mîk kayaritomo kir̂wanî ro? Kporin komo xa Mîk ero warai. Karitî ro xa Mîk. Kar̂pe xa nasî ar̂mano ritohme.

9 Ewto metatan komo awya so wîîkesî xa hara, etahrunkacoko. Pahxanînhîrî komo xa amyamro metata komo. Ero yipu rma etahrunkacoko tak kayaritomo kewomtome ahyaro so, kir̂wanî ro yewomtome ha.

10 Onoke xa Mîk kayaritomo kir̂wanî ro? Kporin komo xa Mîk ero warai ha, kantoman̂e ro ha. Noro yipu Mîkro Kporin komo.