Waano Yaan̂e N̂enîrî On, Tapi Wanorî. Kooso, Enmayataw Cetarisom, On Yosotî

1 Apa, Apa, ponaro oyehtopo Amoro. Ahce kacho Ow mahsîpînkai? Ahce kacho mooxeno wara mai hara? Oyakronomara tak mas okwe. Cemkutun̂e ro makî cma re kîmtapowas awakro. Entan̂e pîn wara rma tko mas okwe.

2 Apa, ponaro oyehtopo Amoro. Ero ke kar̂pe kîmtapowas awakro katpanaw. Omtapotarî yentara ro mak masî. Kosope marha kîmtapowasî. Tîtken̂e exihra ro mak wasî.

3 Kir̂wanî ro mak Amoro, kayaritomo yapon pono ro. Apoko ahwowataw Ixaw Yana komo iito rma mas Amoro yîropotaw so.

4 Amna porin pen komo tî n̂een̂atken̂e apona. Ero wa een̂ataw yîwya so n̂examro mukurunpekn̂e.

5 Awakro tî nîmtapowatken̂e cerewre. Ero ke n̂examro yar̂mapora mîxakn̂e yiixatî pîn komo ya. Yaaro tî apona n̂een̂atken̂e tohnawra ro mak.

6 Kar̂watho makî tko ow ha, tooto pîn mak. Opoko n̂etaporexe tooto komo, owîrîyakexe marha okwe.

7 Ohyari tîtosom komo n̂etaporexe mak okwe opoko. N̂epotuyetkexe mak kica owece. N̂epanamexe owece kica.

8 On wara kexe opoko, Kporin komo pona tî re n̂een̂a ha. Ero ke Noro rma ka nukurunpepe. Noro poko tî re nahwowa. Ero ke Noro rma ka nukurunpepe ha, kexe opoko okwe.

9 Apa, Amoro tko ow mewrunokekn̂e. Pona owya entopo me mesenpekn̂e pahxa moomo yeen̂e me makî ka oyexitaw.

10 Oyewrutopo n̂ixa ro rma apona enîn̂e me mak wîxakn̂e. Onocwan ropotainonho rma ponaro oyehtopo me keen̂akn̂e.

11 Ero ke mooxeno warahra cma re mas Apa. Meyehra naxe okwe oyemetanmekn̂e komo. Anarî exihra ro mak nas okwe oyakronoman̂e.

12 Paaka warai komo mîkyam kîîrî warai. Omamcexe mak okwe. Karitî komo mîkyam omamcexe Basan pono warai, paaka warai ha.

13 Reaw wara mak n̂een̂axe owece. Tootî yarixkan̂e wara naxe oko. N̂emtayankexe ro mak oyermomn̂e wara.

14 Tuuna wara kyam mak was okwe yukmamxaputho wara. Cewkatîkaxi tak nasî ahnoro oyocho yewru. Maan̂i wara tak nas oropotarî yukuixapu wara.

15 Kar̂pe oyehtoponho tak nuturpamtîkekn̂e wakanan̂etho wara. On̂uru n̂etahsîyasî okarantaka. Ow mak mîrapes okwe roowo pona owaitopo pona.

16 Xapari warai komo omamcetken̂e, kicicitho komo ro mak. Oyamoyatpetken̂e ro mak oko, ohtayatpetken̂e marha.

17 Oyocho tak wukuknomesî takporoso xa oyexirî ke. Owece n̂entîkexe tooto komo.

18 Oponontho nahsîyaxe tponon me so. Men̂ekacho nar̂mexe oponontho yahsîn̂e ro yîhtînotome.

19 Apa kah yawno, mooxeno wara exihra cma re mas okwe. Okariton̂e xa Amoro. Yohno cma re amoku xe was oyakronomaxi.

20 Waipîra cma re ow miir̂asî kacipara imo ke etamapon me. Tpoxwe xa nasî waipîn me oyehtopo. Ero ke cma re owaikapora masî xapari warai komo ya.

21 Reaw ya cma re ow eskapora masî. Paaka komo ya oparaxkapora marha cma re masî tmeretîrî komo ke. Ero wa ow yukurunpeko Apa. Omtapotarî meyukyas okre.

22 Ero ke oyakno komo n̂entarî me ketahcasî. Esenmexapu komo n̂entarî me kahwowas apoko.

23 Kporin komo poko tweeno komo, awya so wîîkesî, ahwotacoko Noro poko. Xako pen yepamtho komo, awya so wîîkes hara, Kir̂wanî ro xa Mîk Kporin kom ha, kacoko. Ixaw pen yepamtho komo, awya so wîîkes hara, Noro poko men ehcoko twerî.

24 Kica, ero warai rotho mak amoro kica, kahra xakn̂e Kporin komo cesemetanmesom komo ya. Esewyahrura xakn̂e noro yipu yenîche. Yîmtapotarî xa matko n̂encekn̂e, Ow akronomak Apa, kacho ha.

25 Ero ke esenmexapu komo ya on wara wîîkes apoko Apa, Kir̂wanî ro xa Mîk Kaan, wîikesî. On wara wîîkekn̂e pahxa n̂he, On warai wîmyasî amn̂e Kaan ya, wîîkekn̂e. Ero ke ero yipu wîmyasî awya n̂examro wero ro, apoko tweeno komo wero ro. Ero wa wîmyasî omtapotachonho yaw roro rma.

26 Amn̂e yupurantamnî ro komo rma tak n̂eseresmexe cerepotaxi ro. Kporin komo yenî xatî komo nahwowaxe Noro poko. On wara wîîkesî yîwya so, Tahwore awexi xe so wasî miya roro eroromero.

27 Amn̂e roowo yenatîtopo tono komo meero tak naxe Kporin komo yehtopo ponaro. Noro pona tak n̂een̂axe. Oporinî ro xa Amoro, kexe tak ahnoro etîyananî re komo yîwya. Ero wa kexe anarî maywen komo raconho.

28 Kayaritomo ro xa Mîk Kporin komo. Mik hak maywen komo kayaritomon me rma nasî.

29 Tupurantayem komo marha n̂eseresmexe, Oporinî ro Amoro, karî me. Roowo cheka cetahrusom komo marha nutupenwaxe Noro mamakan me. Ero wa naxe twaihtopo yesakan komo meero.

30 Amn̂e kepamthîrî komo tak naxe Noro yanton me hara. Kir̂wan̂he xa Kporin komo yehtopo n̂encexe.

31 Pahxaro anarî komo n̂ewruyaxe hara kepamthîrî me. N̂examro ya meero tko kir̂wan̂he Kporin komo yehtopo n̂ekatîmyaxe amn̂e. Ero wa kiitoponhîrî komo n̂ekatîmyaxe yîwya so. Ero wa n̂ekatîmyaxe.